Цу хана хиннар, тахан юхадоалалургдац, мел хьежача а. Дуккхадараш хувцаденнад! Халонаш дукха хиннаяле а, вай мехкара экономически хьал тоалуш доагIа, Даьла къахетамца, федеральни оагIоно, Москвас новкъостал лоаттадарах. Болх ца беш, сайца латта моттигаш, эггара хьалхарча аргIагIа юха шоай балха тIа йоалае, аьнна; тIадиллад вай Мехкадас. Россера баьхка цу мугIарера хьакимаш цу моттигашка хьажа баха хилар. Уж хилар кирпишк хьаеча «Гиперпресс» яхача заводе, «Кавдоломит» яхача заводе, антеннаш хьаеча заводе, «Вилс» яхача заводе, «Сердало» яхача технопарке.

Цу моттигашкара хьал тохкаш, дIахо де дезачун йист йоаккхаш, болх дIабихьар цар. Сайца мел латташ йола болха моттигаш къахьега йолаелча, вай республиканна а иштта кхыйолча моттигашта а доккха беркат доалаш хургья. Белгалде деза, гIишлой оагIонцара болх вай республике, тIехьарча хана, дикка тоалуш боагIилга.

Цу гIулакха мел эшача хIаман кхоачам хилийта гIерташ къахьег вай Мехкадас. Тахан хьалъеш латта ишколаш, берий бешамаш, дарбанчеш, кхыйола моттигаш вай кхоане я! Деррига а боаггIача боараме дIадахьар чIоагIа лоархIаме да тахан кхоанарча вахара! ГIишлонхой денца цу мугIарера болхлой даькъалабувцаш вар вай мехка президент Путин Владимир.

Цо белгалдир, халонаш тахан дукха яле а, цу оагIонцара болх, дикка толамаш доахаш, дIабодаш ба вай, аьнна. Болх бе моттигаш Iалашъярга хьежжа, тоалургда мехкара экономически хьал. ДикагIа йола моттигаш лехаш, арахьа дIаух боккхача мехка бахархой. Дукха ха йоацаш мехка венача «Автоваз» яхача АО кулгал деча Соколов Максима белгалдир, гIалгIай мехкарча кагирхошта болх бе моттигаш лургья шоаш, аьнна.

Вай мехка каст-каста дIакхухь, болх боацарашта из луш йола ярмаркаш. Дикка къахьега дезарех ба из оагIув тахан. Миччахьа дIа-хьа бахá а, пайда хургбола болх лех тахан наха. Дуккхача наха моттигаш луш йола йоккхий объекташ яц вайцига. Ший мехка аьттув болаш, моллагIа бола кхоачам корабоагIаш ваха ца ловш саг вайна юкъе вац. Дикка къахьегаро мара тоадергдолаш, хьал дац из. Тахан цу оагIон тIа къахьегаш ба республикан кулгалхой, федеральни Iаьдало гIо деш.

Дикка тоаденнад вайцига туризма хьал, юртбоахама гIулакх. ДIадоладаь деррига гIулакхаш ма хетта пайда беш хилац цхьайолча хана. Тоаде дезар тоадеш, хьинаре къахьегаш, хам беш дIавахаро меттаоттаду деррига. Керттердар бехктокхаме, хьадеча хIамах дог лазаш, къахьегар да!