Укх деношка, Наьсарен Telegram канала тӀа хоам бар, сагӀа даккхара юкъе меценат вена хиларах, цунна бакъахьа хет ший цӀи ца яьккхача. Цун камаьршача новкъосталца кхы а 40 дезал чулаца таро хилар цу сагӀа юкъе, царна кхачан даараш делар. Дика хет из сагӀа гӀадгӀоргболча дезалга кхоачаш, эггара гаьнагӀа йолча юрташка.

Дукха ха йоацаш Наьсарен-Шахьаре укх тӀеххьарча шерашка эггара хозагӀа а дицлургдоацаш а дола цхьана Ифтар дӀадихьар шахьаре, Базорканаькъан проспекта даькъ тӀа, из вӀашагӀделлараш бар «Исхан» яха сагӀа доаккхаш йола ганз, иштта ГӏалгӀай Республикан кулгаговзанчий Ассоциаци.

Шахьара ондаргашта лаьрхӀа викторинаш вӀашагӀъехкаяр, Базорканаькъан И. цӀерагӀча сквере истолаш оттадаьдар даарех хьалдиза.

Цига марха даста венавар 400 саг, хӀаране таро яр ше виззалца хӀама даа, марха доастача истола тӀа вагӀа, дукха дика нах багӀача моттиге.

Наьсарен-Шахьара мэра иштта лаьрхӀар берашта цхьа бӀаь совгӀа совгӀат дала, из цӀай хьаллоацаш.

«Сога хаьттача, цу тайпара моттиг дӀаяхьаро таро лу наха юкъера бувзам чӀоагӀбе, из моттигерча Ӏаьдало хьаллоацаш хила деза. Аз а гӀадвахарца хьаллаьцар из дика гӀулакх, цо гулбир вай хьамсарча шахьаре бахаш бола бӀаьш нах», - аьлар, цу кхетачен лоархӀам белгалбеш, Ӏалихана Руслана.

Атта йоацача ханашца дувзаденна, лоархӀаме гӀа баккхар да мехка хьалхара хьем боаца штаб хьаеллар, цо таро лу вахаре эшача гӀулакхашца бувзабенна болх дикагӀа вӀашагӀболла. Из болх тӀаберзабаь ба таро йоаца дезалаш хьаллацара, иштта СВО доакъашхой дезала новкъостал лоаттадара.

«Вай шахьаре 1,5 эзар совгӀа дезал ба паччахьалкхен новкъостал эшаш: бизза боаца дезал, таронна эшабеннараш, иштта хӀанз болаш болча а, бейнача а СВО доакъашхой дезалаш. Хала хете а, долаш долча хьалашка хьежжа, массаза а вӀаштӀехьадалац из новкъостал массанега дӀакхачийта, цудухьа хьем боаца штаб хьаелларо из массанега, хӀара саг вахача кхоачаргда, республикан кулгалхочо Келаматанаькъан Махьмуд-Ӏаьлас тӀадиллача тайпара»,-аьлар Оздой Руслана.

Лакхе вай ювцача штабо массайолча оагӀорахьара гӀо дергда, цу юкъе кхачан даарашца, тӀабувхача гӀирсаца, молхашца, иштта вахара хаттараш кхоачашдеча, лорашка нах чакхбоахача. Уж да наха дукхагӀа дагадоахкаш дола хаттараш, цудухьа лоархӀаме да уж царна.

«Оаха лаьрхӀад новкъостал лоаттадеш бола дезал кердача хьалашка баха, цу юкъе балха оттабар а долаш, берашта салаӀа моттигаш а цунна чуйоагӀаш»,- аьлар мэра.

Цу тайпара хьем боаца штаб хьаеллар лоархӀаме да, из аргӀанара новкъостал дар хинна Ӏац, лоарххӀаме боаккхаш бола гӀа ба, Наьсарен бахархой вахара хьалаш лорадара даькъ тӀа еш йола кӀийле я. Из тушола бутт чакхбалале хьакхолларгья, цо таро лургья вахаре эша хьалаш хьакхолла, уж толамца кхоачашде.

Шахьара бахархошта цу тайпара дукха дикахетараш дахьаш йола моттигаш эшаш я шоайла бувзам чӀоагӀбара, наьха барт цаӀ бара, дог гӀоздаккхара, царна дикахетараш лоаттадара. Из доккха дика гӀулакх да, цхьан сага мукъагӀа цо дог деладеш хуле. Из деррига хьаллоацаш а баркал оалаш а да.