Гӏалгӏайчен культуран оагӏонцара тӏехьале
Маьтсела бетта 30-ча дийнахьа «Эздий овла» яхача культурацарча проекто «Фуд гӏалаша шоашта чукъувлар?» яха кхетаче дӏайихьар. Мехкарча культуран оагӏонцарча тӏехьаленца дувзаденна лоархӏамедараш гулдир цу моттиго.
Эггара лоархӏаме дола дакъа вай даьй гӏалаш меттаоттаяра говзанча, «Тӏехьале» яхача тӏоговзанчий ишкола кулгал деча Султиганаькъан Рамзанаца хиннача къамаьлах латташ дар.
Даьй истори, вахара никъ бовзийташ йола гӏалаш лораяр, хьалха хиннача тайпара меттаоттаяр мишта хила деза дийцар воккхача говзанчо. Гулбеннача хьаьшашта яйзар цу балхацара кӏоаргаленаш, таханарча заманца хьадаьржарашка гӏолла из боккха болх мишта дӏабахьа беза.
Султиганаькъан Рамзана дийцар тахан вай гӏалаш малагӏча хьале я, иштта цу оагӏонцара кхоачамбоацараш белгалдир цо. Пхьуй яхача юртара хаьрца гӏалаш меттаоттаеш дӏабихьача балхах дийцар цо.
Ма дарра дийцача, еррига гӏалаш хаьрцаяр цига, хӏаьта тахан из болх боккхача аьттонца дӏабихьар. Гулбеннарашта дийцар гӏалай юрташка кораяьча цхьацца вай даьша лелаяьча хӏамаех. Къаьнара вай даьй истори довзийташ да из деррига.
Гӏалгӏай къаман гӏалаш кхы а бӏаьшерашка ца талхаш латтийтарах, тӏехьа тӏабоагӏарашка дӏакхачийтарах дийцар кхетаче. Гӏалай юрташ геттара чӏоагӏа лораяр вайх хӏаране декхар да.
Бӏаьшераш хьалха цига баьхача вай даьй, ноаной истори да из. Берригаш раьза болаш, дикка пайда боаржабеш кхетаче хилар цох.
