Кхетаче дӀахьош дар хьаьша-да тӀаэцара тӀера болча Селий мехка лаьтта, цига гулбелар мехка масса йолча моттигашкара цхьа уйла йола нах. Уж хьаллоацаш бар дукхача къамий мехкара Даьхен кхерамзле лораеш латтараш, цар сий деш, лерхӀамца царна баркал оалаш.

Гамзатов Расула цӀерагӀча Къаман библиотеке дӀадихьар «Даьхен амал дара культура, Ӏадаташ» яха герга истол. Цига хиннараша дийцар кагирхошта Даьхенцара безам совбоаккхаш кхетам баларах, цу даькъ тӀа карагӀдаьннар, культуран моттигаша шоайла бувзам лелабергбола никъ кердабаккхарах.

Герга истол дӀахьош дакъа лоацаш бар кхоллама тоабай кулгалхой; Дагестана, ГӏалгӀайчен, Нохчий, Къилбаседа-Хӏирий, ГӀабартой-Балкхарой, Ставропольски края Ӏилман, культуран болхлой, кхоллама союзий доакъашхой, студенташ.

Кхетаче дӀахьош дийцар Даьхе езаргйолча тайпара бола кхетам луш юкъедаха дезача мах барех, уж лорадарах.

Къамаьл даьраша белгалдир, Ӏадаташ чӀоагӀдар, лорадар массадолча даькъ тӀа лоархӀаме хилар, культуран мах бараш лораде дезарах, кагирхой политика, дешар лакхача боараме даккхар. Тахан, цӀаьхха, чӀоагӀдеш дац вай мехка Ӏадаташ лорадар хьал.

Къаман мах бараш диц ца деш, Даьхе езаш, къаман Ӏадатех хьабоала пайда лелабе ховш хила беза кхувш боагӀараш, аьнна, белгалдир цар. Къамашта юкъе юкъ йолла гӀерташ дола зуламе гӀулакхаш юхататта ховш, нийса дӀахьош хила беза вай кагирхой. Таханарча дено дӀадеххача беса хила беза кагирхошта луш бола кхетам.

Герга истол вӀашагӀделладар, шоайла балха говзал эцара, цига гулбеннараша дийцар кагирхошта лерттӀа кхетам баларах, уж нийса кхебарах, цар сакхетам совбаккхарах, Даьхе езаш уж хургболаш царна тахан латташ дола хьал хьалхадаккхарах.

ГӏалгӀайчен викалий кулгалхо хиннача Абдурзаканаькъан Аьсета дийцар, укх массехк шера Республикански халкъа кхоллама Цӏено, Цхьорой Ӏ. Д. цӀерагӀча ГӏалгӀайчен Лоаман кадетий корпусаца, иштта ГӏалгӀай Республике гӀолла йолча Россе ФСБ анзорий урхалленца айхха бувзам лелабеш хиларах.

Кхетачен-фестиваль йистейоалаш, Даьхенцарча безама программе хоза, доккха концерт делар, цига Махачкаларча керттерча майдан тӀа дукха хьаьший, хьажа баьхка нах гулбеннабар.

Укхаза юха а сцена тӀа яьлар ший концертни номерашца Цхьорой Ӏ. Д. цӀерагӀча Лоаман кадетий корпуса вокалистий квартет, кулгалдеш яр ГӏалгӀайчен цӀихеза хьехархо ГӀарбакханаькъан Люба, Иштта Эбарг-Юртарча кружока Цӏен дешархо Хьаьшанаькъан Имана, из Ӏомалуш я, начӀал долча хьехархочо Пхьиленаькъан Фатимас хьехаш.

ГӏалгӀайчен къонача викалаша шоай сцена тӀарча говзалца цига хьожаш хиннарий дегаш гӀаддигар, цар гойтар шоай хоза оазаш, ашарашка гӀолла шоай дега уйлаш дӀайовзийта ховш хилар.

Хьажа баьхкача наха дукха тӀоараш дийттар; хоза, безам тӀабодаш иллеш доахаш хинна вай бераш хьаллоацаш.

ГӀарбакханаькъан Люба, Пхьиленаькъан Фатима - боккъонца бола шоашта караденнача гӀулакха говзанчаш ба. Уж иштта хиларах, ГӏалгӀайчен дукха къона начӀал дола бераш дегӀадоагӀаш да, цар иштта гӀадбуг шоашка ладувгӀа баьхкараш.

Цу тайпарча хьехархоша беш бола болх тӀехьаленна хул, из Даьхенцара безам совбаккхара, искусство, культура лораяра, лерттӀа гражданаш кхебара накъабоал.