Вахар цхьан метте латташ дац, хӀара дезала хьалхашка декхар отт, хьалкхийна баьнна дезал, фусамца Ӏалашо яь, юстарбахарца дувзаденна. Иштта студент е моллагӀа кхывола саг арахьа хилча, цунна салаӀа а ваха а моттиг езаш хул. Из а да фусам езаш хилар. ДукхагӀа болча наха цу хана из ма хулла зӀамагӀа хилар деза. Дукхача тохкамхоша белгалдаьд, йоккхийча шахьарашка зӀамига фусамаш эцар дукхагӀа юкъедоалаш латтар. Цунца цар чӀоагӀду, из таханарча заман хьалашца дувзаденна хилар: рузкъа кӀезигагӀа доадар, Ӏалам лорадар, зӀамигача хӀаманца бувзабеннача духлохама (философена) тӀехьа хилар. Лоацца аьлча, уж кийча ба педаш чу баха а, шоаш лаьрхӀачунга кхачаш хуле.

Иштта гуш да, вай заманхой тӀехьа тӀайоагӀача ханашка дукхагӀа дола мах бола хьалаш дезаш хургбоацилга. Ӏилманхоша яхачох, 20-30 шу даьлча, дукхагӀа бола нах бахаш хургба шахьарашка, лаьтташ кӀезига хулаш латтар бахьан долаш, цудухьа вай зӀамига фусамаш е езаш хургда, цун хӀара квадратни метр лора а еш.

Белгалду, ГӀалгӀай мехка цу хьалашта накъаболхаш ба, боккха гӀа боаккхаш, цун шаьра аренаш йӀаьхача юртех дӀакхеташ йоагӀа. ХӀара шоллагӀа вахархо уйла еш ва, республикан столице ваха, ший доалахьа йоккха йоаца лаьттан чӀегилг а йолаш. Цу тайпара, вай хьалхарча аргӀагӀа хоржаргья зӀамига квартираш, чухьнахьа гӀирсаш, тайп-тайпара вӀашагӀйохкаш йола чоалхаш, моттиг дукхагӀа хилийтара йола таронаш а йолаш. Иштта эца хьожаргда, ахчанга диллача, башха маьха деза доаца цӀенош.

Цунца цхьана тӀехьашкахьа дусаргда тахан нах цецбоахаш хьалдаь доккхий цӀенош, иштта кхозза вӀаштӀара даьраш а.

Россе бахаш болча наха юкъера цхьабараш хьаийцача, царна цхьа тамашийна хет духхьал диван, цхьа истол чулаттача квартирах 1 миллион сом ахча дех, аьлча. Бакъда цхьабараша цох тӀехьагӀа пайда бе эцаш а хул уж санна йола фусамаш.

Мичча беса из хиларах, шахьарашкара, йоккхача административни центрашкара саг чуваха йиш йола зӀамига фусамаш дукхагӀча наха тахан мегаш я.

ГӀалгӀайче тахан цу тайпара хьал дац, е хургда ала хӀама а дац. Вай довзача тайпара, эггара зӀамагӀа йола фусам я советски ханашка хьалъяьча гӀишлон чура цхьа че йола фусам. Уж нийслу Шолже, Наьсаре, Илдарха-ГӀалий тӀа, Магасе. Вайна-м йоккха йоацача моттиге а паргӀато езаш хул.

Ала деза, kavkaz.RBC хоамий таро ru дӀадахача шера тов бетта хоам баьбар «Къилбаседа Кавказе, Россерчул езагӀа я квартира, аьнна. Цунна тешал ду РФ гӀишлонхой ЦаӀ йолча тарон говзанчаша баьча балхо.

Цу тайпара, дувцачох, РФ хьалъеш йола фусамаш юкъера хьаийцача 49,1 кв метр йолаш хул.

Къилбаседа Кавказа хьалъеш йола квартираш паргӀата хиларга диллача, дикагӀча пхеннена юкъеяхай ГӀалгӀай Республика - 81,4 кв. м; Нохчий Республика - 74,5 кв. м; ГӀаьбартой-Балкхарой Республика- 64,6 кв. м; Къилбаседа ХӀирий-Алания - 62,5 кв. м; Мурмански область - 80,0 кв. м.

Россе 100 йоккхагӀа йолча гӀишлонхой тоабо хьалъеш йолча квартирий юкъара моттиг 47,2 кв. м я».

ГӀалгӀайчен бахархой, эггара хьалха шоай мехка Ӏадаташка диллача, раьза бац цхьан юкъа а зӀамигача квартирашка баха. Е кхы из эшаш хӀама а дац, хӀана аьлча хӀара сага ший гаргара нах ба из хаттар кхоачашдара цунна новкъостал де.

Иштта дале а, дӀадахача 50-70 шерашка инженераша йоккхийча дуненна моттигашка зӀамига фусамаш хьалъяр бакъахьа хилар хьалхадаьккхадар. Бразиле, Рио-де Жанейро дар из сона дагадоагӀачох, иштта Японе столице Токио, Гонконге. Кхы а цу ханашка, шоаш баха кур хьалбиза хиларца, архитектораша уж зӀамига фусамаш хьалъяр наха хьалхадаьккхадар, уж яр цаӀ е шиъ саг чуваха йиш йола квартираш, цу чу хошар истол, зӀамига дегӀа тӀа хий кхорза моттиг (душ), иштта кхыдар. Из деррига, вай ханашка хила йиш йоацаш, тамашийна хетар. Бакъда, из вайцига а хьакхаьчар…

Белгалде дезаш да, нейросетах пайда эц, 2024 шера российски рынке маьхаш дегӀадоагӀаш хилар миштад хьажара. Из эшаш да дӀахойодача хана из дегӀайоалаяра хьал довзаргдолаш, квартираш езараш, е уж арендах хьаэцараш мел ба хара. Хетаргахьа, кастлуш ховш хургда хьатӀадоагӀача 5-10 шера россиянаша мел эцаргья зӀамига фусамаш.

ГӀалгӀайченга диллача, нах чубахара йола фусамаш хьалхарча аргӀагӀа, наха хьалдеш дола шоай доалахьара цӀенош хургда, царна тӀехьа латташ хургья гӀишлон организацеш, вӀаштӀара яь квартираш. ДӀахойодача хана, зӀамига фусамаш а вай вахара юкъеяргья, уж езараш а хургба, уж ба доккха доаца вахара хьалаш дезараш. Вайна гуш ма дий укх тӀехьарча хана, нах шоай тайпара оамал йолаш хилар, Ӏадаташ дицлуш латташ хилар, кхыдола вахарера гӀулакхаш кӀезига леладар. Цу дерригне а наьха уйлаш а хувц, цунцара мах эргабоал цар дегашка.

Кхера дезаш дий-хьогӀ вай цу тайпарча хьалах, нах цу зӀамигача фусамашка бахаш хургхиларах? Масала, мел чӀоагӀа сатем байна дийцар вай республике ХьоалчагӀан цӀенош хьалдеш хилар, цу хана а дагаухаш хиннараш дар, наха вай Ӏадаташ дицлуш латташ хилар. Из нийса теркалдеш дар, вай къаман дикагӀа дола Ӏадат лораде гӀертар уж. Мичча тайпара из хиларах, уж кердадараш вайна юкъе нийслургда, вай цунга дӀаӀамаргда.

Вайна ховш да: зӀамига вахара фусам хургья экономически хьалаш кӀезига долча. Иштта хиннад вай даьшца а цар даьшца а. Цар эггара хьалха цӀихеза «времянка» хьалйора ча тӀа а техе, топпар а хьаьхе, ардакхах, бийдача кирпишках. Ишттача уйла яь даьча цӀеношка бокъонца деррига а дика дӀалаьрхӀе хулар. Ший йоагӀача пишк а, маьнги а, истол а, гӀандаш а латташ хулар, цига дӀанийслора берий ага, ишкап, кулг-юхь дула моттиг.

Таханарча заман кагирхой тешаш бац; цу ханара нах ираз долаш баьхаб, аьлча. Бакъда ма дарра дола ираз, наха юкъера безам, йӀовхал цу хана йолаш яр. Деррига а тийша да сага дог цӀена хиларах, цунна беннача кхетамах, хӀаьта квадратни метраш - уж тӀехьара тӀа хулар мара дац.

Керттердар - цу доккхийча цӀеношка а зӀамигача фусамашка а дика дог-уйла долаш нах бахаш хилар. ТӀаккха берригаш а барт болаш, цӀен тховнаш лакха дацар, аьнна, эшаденна хӀама доацаш; шоайла безаме бахаргба.