Вайна ховш да, РФ Кабмина Госдуме чу денна дувцаш латт, QR-код йоацараш гулбеннача наха юкъе хурбоацаши, берригаш дIа-хьа ухача машенашца лела бокъо хургьйоацаши.

Цхьаккха тайпара нах дIацакхетарах вIашагIделлад из гIулакх мехка Правительстве. РФ вице-премьер йолча Голикова Татьянас яхачох, Госдуме дIатIаийца чIоагIйоай, керда законопроект латтаргья 2022 шера, аьтинга бетта, 1-гIа денга кхаччалца.

Наьха иммунитет цу хана, 80% хьатIаяларга сатувс. Лорабала безам барашта дика бахьан эттад тахан — прививкаш яьчарна ахча дала лаьрхIад. Правителстве соцам баьб, 100 эзар сом ахча цу наха юкъе даккха. Ахча кхаьчараш хьахьокхаргба компьютеро.

Госуслуг портале гIолла ха йиш я деррига. Ахчанца аьттув баьнначун из хьаэца таро хургья ах шера. Тахан, тайп-тайпарча регионашка ши-ший тайпара дIадода из гIулакх. Масала, цхьанахьа соцам баьб, 65 тIехьа баьнна прививкаш яьча пенсионерашта ахча дала, цхьаькханахьа, пенсионерашта 3-4 эзар сом дала лерхI.

Из деррига а гIадвугаш да. Шеко яц, цо пайда бергхиларах. Ма дарра аьлча, вайна гу, Iаьдал шийна моггача тайпара нах лазарах лорабе гIертилга. Бакъда, уйланга вугаш да цхьаькха!

Адам лазарех лорадара уйла е эттача, духхьал цхьан COVID-19 сацац гIулакх. Теркал даьдий оаш, из инфекци яьржачул тIехьагIа, дуккха кхыдола лазараш вIалла ца хилча санна хьоадеш дац.

Сигала даха дIадаьннад уж, е цхьа тамашийна болх этта доацаш да.... Шеко яц, лазараш долаш да, цул совгIа, кхы а кхерамегIа хала йиш йолаш да наха. Из вай массане кхетаду.

ДегIа могашал бера хана денз хьаотташ йолгеи, спортаца, физкультураца бувзам лелабаро из чIоагIъеш йолгеи кхетадеш, дика хургдар, ахчан лоторея гIулакх дикка дIашердича. МоллагIча лазара духьала отта сага дика иммунитет еза, хIаьта из иштта халийтара яьржа хила еза спорт, физкультура, йита еза могашала зе деш йола оамалаш.

Цу дерригнен уйла йича, хьаькъал долаш хургдар-кх из 100 эзар сом спортивни секцешка къахьегарашта, шоайи наьхеи могашала ураэтта латтарашта а тийлача.

МоллагIа пайда хургболча наькъашца могашал лораяра тIахьехаш хила беза нах, тIаккха моллагIа у даьржача, лазаро кагбаьраш иштта дукха хургбац, цул совгIа, Iаьдала бюджетера миллионаш, миллиардаш кIезигагIа довргда.

Баьча тохкамо хьахьокх, спортаца бувзам лелабераш дукхагIча даькъе къонабараш ба. Къахьийгача, боккхагIа бараш а дIатIабига йиш я цу беркатеча гIулакха.

Из иштта хилча, меттайоагIаргьяр цар давлени, дега лазараш лаьгIлургдар, иммунитет чIоагIагIа хургьяр. Вай кхалнахи, маIнахи могашал эшаенна хилар дукхагIча даькъе, дегIа духьала отта низ ца хилар да.

Халача атлетиках чемпион, йоазанхо, политик, цIихеза атлет волча Власов Юрес чIоагIа хьаькъале диста Iодиллад, спорто сага дегIа, оамалашта бу пайда.

Деррига дегI леладер, халонашта духьала отта низ лур физически хало (нагрузки) я. Хеталу, короновирусацара, экономикацара халонаш дIаяьнна яьлча, пенсе баханзеи, бахаи болча наьха спортивни хьал-таро тоаергйола наькъаш лаха деза аьнна.

Из гIулакх лакхача теркаме оттадаь, республикански, муниципальни розыгрышашца ахчан совгIат луш хиларо тIаозаргбар нах спорте къахьега. Шеко йоацаш, цох боккха пайда а хургбар. Цу теркамо Iодуларгдар наьха хьаькъале низи, могашали, хоза дегIи долаш ваха, бера гIаьле Iокхосса езалга, корта бохабу малар дита дезалга, иштта, кхыйолча, дегIа зе деча оамалех хада везалга.