Лоамашка дахача, хин йисте салоӀаш, лакхача лоамашта бухье уллача лайга бӀарг локхаш, цӀена ӀодоагӀача шовдан чам боаккхаш хилча, вайна дика хов хьамсарча Ӏалама мах.

Из деррига дика кхета а деш, вай доккхал ду ГӀалгӀай лоаман хозалах, цул совгӀа безам хул вайцига хьабоагӀача хьаьшашта из дӀагойта. Вай дахаш да хозача мехка, цудухьа гӀерт вай сага дикагӀа хургдола вахара хьалаш хьакхолла.

Вай мехка туризм вӀашагӀйоллара лаьрхӀа дӀахьош хиннача кхетаче, Россе Президента Путин Владимира белгалдир, «дукхагӀа бола нах, тӀехьарча хана, Россе салаӀара тӀера ба. Юха а белгалду: вайна гу чурча туризма терко тӀайохийташ хилар. Цо таро лу туризм дегӀайоалаярал совгӀа, моттигашка кхыдола къахьегама доакъош а дегӀадоаладе».

Тахан къаьстта из толам баккхара ГӀалгӀайчен Ӏаьдала болхлой, боахамаш тӀадерзадаьд цу гӀулакха. ГӀалгӀай Республикан Кулгалхочо, Келаматанаькъан Махьмуд-Ӏаьлас белгалдир, шергара шу массаза доал ГӀалгӀай мехка туристаш дукхагӀа ухаш хилар, мехка Ӏаьдало керда туристически проекташ дегӀайоалаеш латт. Царех цхьа проект я «ЦӀай-Лоам», из дӀайолаяьй 2020 шера, - хӀанз цецвоаккхаш дола толамаш хьагойташ а я из.

Ер шу чакхдоалаш, пхе седкъан гостиница хьалъергья 40 фусам, 100 маьнги-моттиг йолаш хьаьший тӀаэца; цул совгӀа СПА-центр, ресторан.

ХӀанз инвестора терко тӀаяхийтай цунна, цо ЖӀайрахьа кхале, из леладара бокъо йола лаьтта даьккхад, кастлуш из хьалъе болалургба цу тӀа.

Гостиницал совгӀа, эггара Ӏалама хозагӀча моттиге йоккха а зӀамига а автобусаш Ӏоовттае моттиг а ергья. Автотуристашта, велосипедашца леларашта салаӀа, хӀама яа моттиг хургья.

Къаьстта терко ергья наькъа боагӀача наха дин гӀулакх де таро луш: инвестораша хьалдергда наькъаца ламаза цӀа, хоза архитектура йолаш, из хозача гӀалан хьисапе хьалде лерхӀ», - аьлар цо.

Келаматанаькъан Махьмуд-Ӏаьла тешаш ва, «ЦӀай-Лоам» ГӀалгӀайчен жовхьар хинна дӀаоттаргхиларах, цо тӀаозаргба керда туристаш-республикан хьаьший, ше морг кхы йоаца культура, мехка хозал го безам бараш.

Хоам бу, карарча хана дика дегӀадоагӀаш да машина наькъаш, курорташ, гостиницаш, ресторанаш, кафеш,иштта юкъарлонна моттигаш хьалъяр. Шоай доалахьара хӀама леладара кийча болча наха вахара юкъедоаккхаш латт туризм дегӀайоалаяра дола хьал.

Уж мо йола моттигаш республике дукха я. Вай гӀалаш, Ӏалама моттигаш, баьцаш, дийнаташ, Российски Федерацен кхыча моттигашкарча бахархой терко тӀаозаш да. Хьалхара вайцига нийсвенна турист укхазарча хозалах цецвоалаш хул, къаьстта исторически тешалах, къаман вахара Ӏадатех.

Иштта вайна а довзаш хул Россе мехка, областий кхыдолча къамий вахара наькъаш. Вай тешаш да, ГӀалгӀайчен бахархой а гӀоргба Эдала, Урала лоамаш, Сибрера хиш, е гаьнара юрташ йолча, царна довзаргда вай боккхача мехкара вахар, хӀара къаман культура миштай, довзаргда цар Ӏадаташ. ДукхагӀча даькъе цу гӀулакха юкъе дакъа дахьаргда вай кагирхоша, шоайла бувзам лелабергба.

Нах массаза а хьож тамашийна моттигаш го: лакхача лоамах чуудаш дола хиш, гӀишлон кӀоаргал, лакхал, кхы дӀаходар а.

ГӀалгӀай мехка венар из деррига бӀаргадайна Ӏергвац, кхыдола дукха дикаш да вайцигара хьаэца.

ГӀалгӀайчен туризмо керда уйлаш лургья, вӀалла а йицлургйоацаш хургья уж.

Мехка хьаьший юха а хьоашалгӀа бахка безам болаш хургбола хьалаш вӀашагӀдохка деза, вай хьаьша тӀаэца харо, истол оттадаро, царна эшаш дола хьалаш дика вӀашагӀдохкаро масал гойтаргдолаш кхычарна а. ТӀаккха цар шоай гаргарча нахага, бовзарашка, безарашка цох бола хоам дӀакхоачийтаргба. Лоаман хозаленаш, ӀадоагӀа хиш, кхерах хьалъетта гӀишлош, дедда доагӀа шийла шовда го безам бараш совбоалаш хургба.

Вай дикагӀа дола Ӏадаташ, гӀулакхаш лелаш хила деза хьаьша-да тӀаэцара даькъ тӀа.