Бувзама керда оагӀув
Экономически бувзам чӀоагӀбе лаьрхӀа ба шин мехка кулгалхой
Мехкашта юкъера бувзам чӀоагӀбеча балхах дувцаш, кхетаче дӀайихьар вай мехкадас Келаматанаькъан Махьмуд-Ӏаьлас ГӀаьбартой-Балкхарой республиканна кулгал деча Коков Казбекаца. ВӀашагӀкхетаре къаьстта боккха теркам тӀабохийташ дийцар туризмах, промышленностах, юртбоахама гӀулакхех, культурах, ӀТ – оагӀонах. Шинна мехка пайдане хургйолча проектех дийцар кулгалхоша. Из хоам «Сердалога» бир Мехкадаь зарбан болх лелабераша.
Инвесторашта аьттув лургбараш доаржадеш я республика, хӀаьта туризма хьал тоадар тахан лоархӀамеча гӀулакхех да. ГӀаьбартой-Балкхарой мехка туризм дикка тоаеннилга теркалдеш, шинна оагӀоно лаьрхӀар, цхьана болх лоаттабеш дӀахьош болча бувзамо дикка пайда боаржабе тарлулга. Цул совгӀа, вай республике ӀТ-оагӀув дикка тоаеш я карарча хана, керда говзанчаш кийчбеча гӀо деш хургья.
Котало яьккха 80 шу дизара хетаяь кхетаченаш кийчъеш бола болх цхьана дӀабахьар лоархӀаме долга теркалдир кхетаче. Коков Казбека белгалдир, тахан ГӀалгӀай республикан гӀулакхаш дикка тоалуш доагӀилга, къаьстта ӀТ - оагӀонца дувзаденнараш, цхьана дешара программаш хьакхоллаш дӀадихьача пайда беш хургхилар хьоахадир цо.
Шинна а оагӀоно Паччахьалкхений викалашта юкъера из болх дӀахьоргбола тоабаш къоастаергья дӀахо дӀайодача хана. Дукха ца говш, цу оагӀонца дувзаденнараш тахка, цигара хьал ма дарра довза аьнна лоалаха уллача мехка гӀоргья вай мехкара тоаба.
