Иштта лакха терко еш, дӀадихьар кхерамзлен гӀулакх. Таханарча Россе президента дехарга ладийгӀа, хоржамий моттигашка хьабаьхка, шоашта бакъахьа хетача сага тӀехьа кхадж тессар бахархоша. Хоржамашта тӀахьожам беш йола хӀарман штаб хилар вайцига болх беш, видеотӀахьожамга гӀолла хьахьокхар хоржамий доазонашкара гӀулакх мишта латт. 142 хоржамий моттигаш яр вай мехкарча юрташка, шахьарашка болх беш. Хьалхарча дийнахьа денз, нах ихар Россе кхоанен оагӀув хьаллаца. 

Республикан бахархоша кхетадора, мехкара вахара-экономически, политически хьал тахан шоаш беча хоржамга хьежжа хургдолга; цудухьа, цхьа барт, бувзам болаш, чакхдаккха гӀертар уж вай боккхача мехка лоархӀаме дола гӀулакх. Балха моттигашкара бӀарчча тоабаш, дезалаш цхьана хьаихар хоржама моттигашка, Ӏуйре хьаэттача денз.Артисташа шоашта могар дора, нахага из ди дог делаш дӀадахьийта гӀерташ. 

Лакхача боараме дар вай хьаькъал долча къоаноша из гӀулакх хьаллацар. Массанена хоза масал гойтар цар. Вай къаман цаӀ мара воацача Cийлахь-боккхача тӀема ветерана Медаранаькъан Мухьмада 100 шу дуз укх шера. Хоржамаш долча дийнахьа, из волча ваха хилар вай Мехкада. Росси маьрша латта даькъала ювцаш, хоржамашка кхадж тессар Шолжа-Шахьарерча 90 шу даьннача Павлова Антонинас. Иштта 100 шу даьннача Оздой Зейдата хьаллаьцар из гӀулакх, ший декхар кхоачашдеш.

Хьуле вахача 91 шу даьннача Иленаькъан Берста ший кхадж тессар, эггара дикагӀа хеташ волча президент хила гӀертача сага тӀехьа. Бе-беча къамий культурай вайцигарча автономей доакъашхоша; Россерча къамашта юкъера барт, бувзам чӀоагӀа хила безилга хьагойташ; кхадж тессар хоржамашка. Дега тоам беш да, гӀалгӀай мехка тахан 17 къаман культурай автономеш хилар. Нохчий, эрсий, гӀуозлой, туркий, татрий, гуржий, иштта кхыдолча къамий нах бах вай республике.

Токмакски кхалера бахархой укх наькъа эггара хьалха кхадж тоссаш бар РФ президента тӀехьа. Шоай хоржам беш бар къахьегама ветеранаш, хьакимаш, студенташ, кхоллама болхлой, ахархой, лораш, ноаной хила беза кхалнах, спортсменаш, МВД болхлой, журналисташ, гӀишлонхой, иштта дуккха кхыбараш а. Вахаро хьахьекхад, боаггӀача боараме боккхача мехка доал дергдола саг харжар, мел лоархӀаме да. Дега тоам беш дар, РФ президента хоржамаши ГӀалгӀайче Россех дӀакхийтта 254 шу дизари цхьана нийсдалар.

Из теркалдеш, вай Мехкадас белгалдир, 1770 шера вай даьша Россех дӀакхеташ баь хоржам боагӀаш баьлга, тахан вай цу гӀулакхах доаккхал деш долга. ГӀалгӀайче Россех дӀакхетарах долча доккхача цӀайца, республикан бахархой даькъалабийцар РФ парламента лакхерча палата спикер йолча Матвиенко Валентинас. Дог гӀоздоаккхаш дар, хоржамий деношка вай мехка керда берий бешамаш, спортаца ювзаенна моттигаш хьаеллар. Россерча кхыйолча моттигашца халонашта духьалъувтташ, мехка дикагӀдар юкъедоаладеш, дӀачакхваргвола президент хоржаш яр вай республика. 

Белгалде деза, федеральни оагӀоно новкъостал деш, вай мехка дукха керда гӀишлош хьалъяьлга; юртбоахама хьал хӀара денна тоалуш латтилга; дешара, унахцӀенон гӀулакх лакхача боарам тӀа доаккхаш къахьегилга; наьха вахара хьал тоадергдараш юкъекхувлилга. РФ президента хоржамашка дакъа лоацаш хиннача хӀара вай мехкахочо хоржаш хиннар ший кхоане яр. Тахан хержача президентага хьежжа хургда вай кхоанара денош, из кхетадеш, дикагӀа хургва аьнна хеташ вола президент хоржаш бар ГӀалгӀайчен бахархой. Россе низ хиларга хьежжа; паргӀата, маьрша, беркате хургда вай вахар а!