Европа викалаша ГӀалгӀайчен цига бахача нахаца цхьана вӀашагӀъеллача презентаце ший наӀараш хьайийллар; республикан, Кавказа юкъерча тамашийна хозача Ӏадатий, искусствон, исторе дунен наӀараш. Кхетаче дӀахьоча гулбелар овла цигара болаш бахаш бола нах, шахьара бахархой, студенташ, моттигерча университетий хьехархой, иштта Бельге культуран ассоциаце викалаш, уж бар Россе культура керда оагӀонаш йовза безам бараш. Къонача гӀалгӀаша, Франце, Бельге, Норвеге университетий студенташа цига къамаьл дир шоай мехкара викалаш бовзийтарах тарра, ГӏалгӀай Республикан хозал ше ма ярра йовзийташ.

ЛаьрххӀа дола хьаделлар хилар Брюсселерча Россеца бувзам лелабара викалий кулгалхочо Вера Георгиевна Бунинас моаршал хоаттача дешашца. Цо белгалдир цу тайпара культуран оагӀонаш шоайла екъаш хилар чӀоагӀа эшаш долга, цо Россе, Европа мехкашца бувзам лелабе таро лу, шоайла дикагӀа кхеташ хилар лакхду, аьлар цо.

«Оаш вӀашагӀбеллача Ӏилман-документальни гойтамо тешал ду, ГӏалгӀайче - из тамашийна мохк хилара, ший тайпара исторически тӀехьале йолаш, тхьоврарча ханара хьадоагӀа хоза Ӏадаташ, культуран мах бараш долаш, цу юкъе туристически таронаш а йолаш», - аьлар Вера Георгиевнас.

ГӏалгӀай Республикан арахьарча бувзамий, къаман политикан, зарбан, хоамий министра Мизенаькъан Руслана къамаьл дир Брюсселе гулбеннарашка видео бувзаме гӀолла, цо белгалдир культуран бувзам дӀа-юха лелабеш хилар лоархӀаме долга.

Иштта цига къамаьл деш хилар ГӏалгӀайчен культурах, исторех лаьца дош оалаш Франко-ГӏалгӀай тохкама центра кулгалхо Боканаькъан Ӏийса.

Цо дийцар гӀалгӀай къаман эзараш шерашкарча исторех, цун мах болча тамашийнача, ше морг кхы йоацача культурах, ноахалгара ноахалга кхоачаш из лелаеш хиларах. Боканаькъан Ӏийсас иштта белгалдир гӀалгӀай дезал европа юкъарлонах дӀакхийтта хилар, цар культура, Ӏилма, мехка экономика дегӀайоалаеча шоай дакъа юкъедахьаш хилар. Ше къамаьл даь воалаш, цо хьаьший бийхар видеороликага хьажа, ГӏалгӀайчен Ӏалама хозал гойташ йолча, тайп-тайпарча доакъош тӀара вахара оагӀонаш, из дегӀаяра даькъ тӀа хулаш дола хувцамаш го.

Керттера дола кхетачен дакъа йистедаьлча, ГӏалгӀайчен Ди дӀахьоча баьхка хинна хьаьший, доакъашхой бахар «Хургдолчун тӀехьале» яхача гойтамга хьажа. Гойтаме оттадаьдар ГӏалгӀайчен, Норвеге суртанчий балхаш. Цар гойтар керттера исторически хьалаш, туристически оагӀонаш, таронаш. Хьаьшаша боккхача безамца Ӏомадора кулгаговзала балхаш, цу юкъе керттера дакъа дӀалоацаш дар къаман дувхар, цӀихеза истинг оала кӀувсаш дара балхаш, иштта кхы дуккхадараш, цар хьагойтар гӀалгӀай къаман тамашийна Ӏадаташ.

Цига гулбеннарий иштта таро хилар къаман даарах кхета. Хьаьшашта юкъе бусалба нах хиларах, из болх вӀашагӀбеллараша лаьрххӀа марха даста моттиг яьяр цу гӀулакха кечдаьча цӀагӀа. ГӏалгӀай къаман викалаша, хьаьшаша «Магриб» ламаз дир, марха даьстар, ГӏалгӀайчен бахархошта дуӀанца дикадар дийхар Даьлагара.

Презентаце, иштта нах вӀашагӀтохара чаккхе еш, хьаьший тешаш бар из санна йолча культуран кхетачено Европа юкъарлонна ГӏалгӀайчен культуран тӀехьале дӀайовзийтара доккха дакъа юкъедахьаш хиларах. Брюсселе ГӏалгӀайчен Денош дӀадахьара йолча комитето баркал аьлар Брюсселерча Эрсий цӀен болхлошта, кулгалхочунна Бунина Верайна, иштта Бельгерча, Францерча гӀалгӀай дезалашта, цар цу тайпара культуран проект кхоачашъеча дакъа лацарах.

Франко-ГӏалгӀай центра зарбан болх лелабераш, Брюссель.