Доазув доаца новкъостал
Даим новкъостал де кийча ва гӀалгӀай гӀонча Пхьилекъонгий Зураб
Вай къаман дикача, сийдолча воӀах дувца лов сона тахан. «ГӀибухера столица» яхача ООО кулгалхочун хьалхара гӀонча вола Пхьилекъонгий Зураб, тахан наха беркате хургдолча хӀаман тӀехьа къахьегаш, дикка гаьнаваьннав. Шийна хьалхашкара декхараш дукха дале а, наха гӀо де ха корайоагӀа цу сага массахана. ГӀибухерча-Малхбузерча федеральни оагӀон гӀалгӀай республикан массазара викал волча Овшанаькъан Муслима белгалдечох, тӀема операци йолаеннача хьалхарча дийнахьа денз, бӀухошта эшачунга хьожаш, цар оагӀув хьаллоацаш хьавоагӀа Зураб.
2023-ча шера саькура бетта, ший ахчах ийца 2 тонн кхача, кхыйола эшаш мел йола хӀамаш яхьийтар цо, тӀема операцен юкъе Даьхе лораеш латтача вай бӀухошта. Массехк бутт хьалха, цӀихезача 503-ча полка бӀухошта массадолча наькъашка гӀолла чакхйоалаш йола машин елар цо. Карарча хана, Донбассерча наха гӀо дахьийта хӀамаш вӀашагӀтохаш ва Пхьилекъонгий Зураб. Цу дерригане хьагойт, вай мехкахо эздий, яхь йолаш, Даьхенах дог лазаш саг волга. Хала ханаш айттача, берригаш цхьа тоаба хинна дӀаовтта беза. Иштта хьабаьхкаб вай даьй массаза.
29 шу хьалхара ханаш дагалаьцача, гӀалгӀай къаман хӀара цӀагӀа хӀана бац аьнна, вай чубита нохчий бахар. МоллагӀа тӀом эттача, эггара хьалха халчаовттараш шоашка да баьха маьрша нах хул. БӀарчча дезалаш цхьан, шин цӀалга чу боахкаш, шоай фусамаш беха арабаьннача нахаца екъаш, бар вай къаман нах. Иштта хиннад вайна юкъе массахана. Бусалба динга диллача, массайолча оагӀонгахьара хьежача, кӀалвисачун гӀо дар, цун оагӀув хьаллацар доккхагӀа долча дикаех да. Яхь яр нахага кхаьчача халонна юхегӀолла тӀехваьнна дӀавохалургвац, моллагӀча тайпара даь а гӀо де хьожаргва. Ӏа даь дика, мичча хана кхаьча, доккхагӀа долча дикашца хьога юхакхоач. Пхьилекъонгий Зураба леладеча дикаех дувцаш, хьоахаде лов, цун кагирхошцарча бувзамах.
Цо гӀо деш, укх тӀехьарча шерашка ГӀалгӀайчен паччахьалкхе кхоллаенна 100 шу дизара хетаяь дукха студентий яхьаш, этно-боламаш, фестивалаш, кхетаченаш дӀакхихьай вай мехка. Иштта йолча кхетаченаша вӀаший бувзам лелабе, ховр дӀа-хьа эца Ӏомабу кагирхой. Цул совгӀа, къаман исторецара, культурацара, тхьовра денз хьадахьача Ӏадаташцара безам чӀоагӀбе Ӏомабу кхувш латтараш. Ший къаман сага моллагӀа толам баьккхача дега чӀоагӀа тоам хул, вӀалла хьона из саг вовзаш веце а. Ший къаман яхь хилар, лерхӀам хилар да из! Вай цаӀаш да, массахана вӀаший барт, безам лорабеш, дӀадаха дезаш да! Къаман сийдола воӀ массанена вовзаш хул. ТӀема операцен доакъашхошта гӀо деш хиларах, майдилг еннай Зураба, Парламента кулгалхочо грамота еннай, иштта кхыйолча моттигашка а белгалваьв. Дукха ха йоацаш, гӀалгӀай паччахьалкхен 100 шу дизарах йола майдилг елар цунна вай Мехкадас Келаматанаькъан Махьмуд-Ӏаьлас.
Аьттув хилба цу сага, дӀахойодача хана а; иштта хьинаре, къамах дог лазаш къахьега, толамаш даха!
