Бокъонаш лораяра тӀехьа дукха болх баь волаш, дуккхача дикашта тӀехьа белгала волаш вар- Келаматанаькъан Махьмуд-Ӏаьла, вай республикан кулгалде хьатӀавенача хана. 2019-ча шера ахкан хьалхарча бетта 26-ча дийнахьа РФ Президента амар денна, ГӀалгӀай Республикан кулгалде оттавир из. Диъ шу сиха дӀадахар, хӀаьта даь латтача дикашка хьежача, уж дукха да. Дуккхача шерашка прокуратуре къахьегаш, дукха лоархӀаме гӀулакхаш чакхдоахаш лаьттача Келаматанаькъан Махьмуд-Ӏаьлан дика довзар укх республикера хьал. Ма дарра аьлча, малагӀча моттиге фу доалл, фу леладу, дика довзаш вар из хьатӀавоагӀача хана. Нах бекъаш дола хӀама юстардаьккха, къахьега ловш, ховш мел барашка кхайкарал дир цо, мехка гӀулакх тоадара тӀехьа, цун сий хьалдоаккхаш къахьегаш дӀадаха деза вай, аьнна.
Беррига хьакимаш, къахьегамхой, бизнесменаш, лакхача боараме, бехктокхаме шоай болх дӀахьош латташ, массахана нийслац... Мехкадаь шоаех хинна тешам боабаьраш а нийсбелар... Цун ма хетта къахьегаш хиланзар цхьаццабараш. Белгалде деза, из хьатӀавенача шера денз, мехка хьал дикка тоадеш къахьегараш а хиннилга. Келаматанаькъан Махьмуд-Ӏаьла хьатӀавеначул тӀехьагӀа, налогехи кхыдарехи вӀашагӀкхеташ хинна ахча айделар, 2,3 млр кхоачаш. 2019-ча шера 3,2 млр лаьтта из таьрахь 2022-ча шера 7, 3 млр кхоачаш айделар. 11,8 млрд вай республиканна тӀалаьтта декхар, 3,4 млрд Ӏотадоаладир Мехкадаь къахьегамца. Республиканна тӀалаьтта 5,8 млрд кредит 1,9 кхоачадир. Боккха болх дӀахьош, дукха, хьинаре къахьегарца аттачахьа дерзадир цу мугӀарера гӀулакхаш. Республикерча дуккхача политикий, экономистий, региона аналитикий сатем боабаь, дуккхача шерашка дӀаьхденна дӀагӀоргда аьнна хийтта из доккха декхар аттачахьа даккхара тӀехьа, дикка къахьийгар Мехкадас. Дукха хана денз болх соцабаь лаьтта моттигаш а къахьега йолаелар... Юртбоахаме хьегаш дола къа хьаийцача, дикка толамаш даьхад вай укх тӀехьарча диъ шера.
Дикка тоалуш латт мехка туризма хьал. Республике салаӀа бахка безам бола хьаьший, хӀара шера дукхагӀа хулаш латт. Республика керте латтача сага, ший мехка хьал тоаде гӀерташ хьега къа зувш да. Воккха хьаким хилча, ший оамалаш ца хувцаш, хьалха ше хиннача беса, нахаца Ӏимерза, цар халонех кхеташ, хӀаранега ладувгӀа ловш хилар, мах баь варгвоаца доккха дика да! Наха гӀо де дага, дукха беркате проекташ кхеллай республика кулгалхочо. Мел лоархӀаме, дика проект я, шоай коа бешамаш лелаеча наха новкъостал де цо юкъеяьккхар. Хам баь варгвоацаш я, хала таро ярашта, байнача полице болхлой дезалашта, тӀема доакъашхой гаргарча наха цо еш йола терко. ХьатӀавенача дийнахьа денз, мехка эггара хьалхарча юхьанца тоаде дезараш меттадоаладеш латт, РФ Президента тешаме саг ва, аьнна, хержа хьатӀавайтача вай Мехкадас. Тахан республике дӀахьош я дукха моттигера, къаман проекташ. Келаматанаькъан Махьмуд-Ӏаьлас мехкара экономически хьал тоадара тӀехьа юкъеяьхача цу проекташа, республикера хьал дикка аттачахьа даьккхад. Тахан хьегаш дола къа — вай сийрда кхоане! Укх диъ шера, дукха керда берий бешамаш, ишколаш, культуран цӀенош, спорта моттигаш хьайийллай вайцига.
Къаьнара ишколаш тоае юкъеяьккха, лаьрххӀа проект я. Дика хувцамаш дукха да мехка! Хьадаь латтараш хам баь варгвоацаш да, хьинаре къахьегаш латт дӀахо а, тишденнар тоадеш, сеца латтачунга болх байташ, кердадараш хьакхоллаш. ДӀа-хьа хьежача, вайх хӀаране зувш дола хувцамаш да уж! Россе регионашта гуш да тахан, гӀалгӀай мохк хӀара денна тоалуш, бӀаьхий хулаш, хьалха вӀалла а хургдац аьнна хийтта доккхий хувцамаш хулаш, эргабоалаш латтилга. Тахан вайх хӀаравар укх мехках доаккхал де йиш йолаш ва! Цу тӀа кхоачаде гӀерташ, дукха дикаш доаржадеш, хьавоагӀа, ше болх беча диъ шера, Келаматанаькъан Махьмуд-Ӏаьла!
