«Мехка «ЦаӀ йолча Россерча» новкъосташа са кандидатура ГӏалгӀай Республикан Кулгалхо хоржача юкъейихьай. Хьалхарча аргӀагӀа, цу парте доакъашхоша луш бола боккха тешам ба из, аьнна, хет сона; иштта вай мехка хургдолчох бола боккха бехктокхам а ба.

Пхе шера, вай бахархой вахара хьалаш тоадара дукха къахьийгад. Цу юкъа дукха проекташ кхоачашъяьй, уж дӀахойодача хана а, ГӏалгӀай мохк вахара-экономически дегӀабара дика Ӏаткъаш а хургья.

Хьакхеллай промышленность, юртбоахам, туризм дегӀаяра йола кӀийле яьй. Мехка йоккхий инвестицеш юкъеяьхай, тахан цар лакха технологеш лелаеча даькъ тӀа доалахьара хӀама хьадар дегӀадоаладу», - иштта аьлар Келаматанаькъан Махьмуд-Ӏаьлас, тахан ГӏалгӀайче эггара чӀоагӀагӀа бувцаш бола керда хоам белгалбеш.

Махьмуд-Ӏаьла харжа оттавар дувцача юкъегӀолла хьоахадир единороссаша ГӀирмера, ГӀабартой-Балкхарой мехкара кулгалхой Аксенов Сергей, Коков Казбек харжар хьаллоацаш хилар.

Мехка Президентага, моттигашка кулгалхой харжа нах могабе бокъо йолаш я кхыйола парламентски партеш. Царга а хьежа, ГӏалгӀайчен, ГӀирман, ГӀабартой-Балкхарой законадаш кхолларашка кхоккха кандидатура дӀайохьийтаргья Путина. ГӏалгӀайчен Кулгалхочун дарже могавечунга хьожаргба республикан Халкъа Гуллама депутаташ. Мехка кулгалхо хоржаргва ГӏалгӀайче, тов бетта 8-ча дийнахьа.

Пхи шу хьалха республикан керте эттар Келаматанаькъан Махьмуд-Ӏаьла. Политически хьал чоалхане латтар цу хана. Цун хьалха латтар атта доаца декхар - хӀарма вӀашагӀтохар, мехкарча Ӏаьдалах бола наьха тешам чӀоагӀбар, экономически дегӀаахар, республикан цхьоагӀо, социальни даькъ тӀара хьал дегӀадоаладар, наьха вахар тоадар.

Кердача кулгалхочо, ше хьатӀавоаггӀашехь, бизнес дегӀайоалаяр юкъедаьккхар, цунна эшаш дола дика хьалаш хьакхеллар, республика экономически дегӀаухаргйола оагӀув хьабир, инвестицеш юкъейоалайир.

ГӏалгӀайчен Ӏаьдал чӀоагӀдара теркам тӀабахийтар; транспорта, энергетикан, дешара, унахцӀенон доакъош тӀара хьалаш тоадара Ӏалашо йир.

ГӏалгӀай мехка, таро йоацаш бола нах хьаллацара новкъостал дукха даьд; дешара моттигаш тоаяра, керда балха моттигаш хьакхоллара гӀо даьд. ЛоархӀамедар да, моттигера бахархой моллагӀа дола хаттараш кхоачашдеча дакъа лоацаш, юкъеозаш хилар, граждански юкъарло дегӀайоалаеш хилар.

Ше лакха говзал йола юрист хиларга хьежжа, цо кулгал дир бокъонаш лораяра, цхьоагӀо яра, бахархой кхерамзлен Ӏалашо яра, зуламхошца къовсам лоаттабара, кхааш ийдара гӀулакх юкъера дӀадаккхара.

Мехка Кулгалхочо укх пхе шера дика хьаллаьцад культуран, Ӏилман, дешара даькъ тӀара хьал; массахана теркам лоаттабу музея, театра, библиотекай, кхыйолча республикан балха моттигашта.

Тӏехьарча шерашка, ГӏалгӀайче дукха культуран Цӏенош хьалдаьд, республикан еррига юрташ юкъелоацаш дӀабихьаб из болх, итташ дешара моттигаш, деша даха ха йоацарий моттигаш кхеллай. Дешара юкъейоаккхаш я ӀТ-технологи, туризм дегӀайоалаяра таронаш хьакхоллаш я, мохк дика дегӀабоагӀаш латт. Деррига кхоачашдаьд ала йиш яц, бакъда дуккхадар хьакхоллара наькъаш гуш да, республикан бахархоша уж хьаллоацаш а да.

Келаматанаькъан Махьмуд-Ӏаьлас федеральни Ӏаьдалца дика бувзам лелабу, паччахьалкхен программаш кхоачашъеча толаме дакъа лоац. ГӏалгӀайчен масалах тахан ала йиш йолаш да, ханаш чоалхане яр аьнна доацаш, вай мохк дегӀабоагӀаш а ба, цу кхоллама наькъ тӀара вай доаха а лургдац.