ТIема болхло волаш ваха атта дац! Хьа вахарца дувзаденна, массахана хьо кийча хила везаш, декхар да из. Кхыйолча болх-моттигашка, Iурра гIатта ца кхувш тIехьависа, мичча хана хьо ваха дIаэттача той а, тIема гIулакх токхаш латтараш иштта баха йиш йолаш бац; хIана аьлча дерригача къаман гIулакх лорадеш латта саг ва из! Нах тайп-тайпара оамалаш йолаш хул, цунга хьежжа хул хIаране вахара никъ а. Полице болхло мишта хила веза хьагойт ший оамалашца «Беркат-Юг» яхача ОМОНа воккхагIвола психолог волаш къахьегаш волча Доврбиканаькъан Хьасана. Ший атта боаца никъ, наькъашкара хьал лорадеш латта болхло волаш, дIаболабир Хьасана. Ше хьаийца никъ безаш, доккхача толамашка кхача гIерташ, къахьегаш хьавоагIа из. Деша оттача хана, йиъ бийса яьккхар цо Кубански паччахьалкхен университета коа.

ТIехдика дешаш, чакхъяьккхар цо Москвера МВД университет. 2011-ча шера денз, ОМОНа тоабан юкъе ший декхараш токхаш хьавоагIа Хьасан. Таханарча дийнахьа из полице майор ва, воккхагIвола психолог волаш, наха гIо деш латт. «ОМОНера болх сона массахана цхьа дега гарга хиннаб. ТIабувха гIирс, моллагIа герз леладе хар, иштта кхыдараш а дезаденнадар сона. Цхьан хана-м моттацар сона, сай деррига вахар къаьстта цу балхаца дувзаденна хургда, аьнна, бакъда барт болаш йолча тоабо хьахьекхар, ший Даьхе лораеш латтарал дикагIа болх боацилга. Тахан-м сога дуталургдацар ер гIулакх. Дега геттара хьамсара ба, сайца болх беш бола кагий нах, дезаш леладу айса хьаийца гIулакх«, — дувц полице майора.

Эггара дикагIвола болхло волаш, ший декхараш кхоачашдеш, латт из тахан. РФ президентагара Путин Владимиргара, вай Мехкадаьгара баркал оалаш каьхаташ тийннад цунна. Украинерча тIема операцен юкъе майрал гойтарах, майдилг луш белгалвир из.

Ше леладечун хам беш хилча, геттара чIоагIа ураотт Даьхен гIулакха латтача сага дог. «Сай хьалхара ди дагаух сона... Лаьттар хала ха яр, атта дацар, бакъда дог тедеш хилар, саг кIалхарваккха сай аьттув балар. Вахаре сага эггара чIоагIагIа лораде дезараш да эхь, эздел, сий. Ше хьаваьнна моттиг йовзаш, ше кхеваьрий дегаш деладеш, дIаваха веза миччахьа вале а. Къаман Iадаташ, оамалаш лоархIаш ваха веза къаман воI!» Тахан кагирхой гIулакхах йолча комитетаца цхьана, кагирхошца кхетачеш дIакхухьаш, лекцеш еш цо.

Росгвардерча декхарех, вахаре эггара хьалхарча аргIагIа лораде дезарех, дувц цо кхувш латтарашта. Белгалде деза, Хьасана дуккхача шерашка, Даьла духьа, могаш боацарашта цIий дIачутелилга. «Украинерча наха чIоагIа хоза, зизашца тIаийцар тхо. Эшаш мел дар, кхача тоъаш хулар. Цхьан дийнахьа, тхоашка мел йола яа хIама, цхьаккха хIама доацаш бисача наха дIаелар оаха. Цу юкъерча цхьан кхалсага дехар дир сога, Украинера Россе дIаяха гIо де шийна, аьнна. Лакхе латтарашка хоам бир аз цу гIулакхах, цунна эшачунга хьежар уж. Ше машена чу дIачухоаяьча хана: «Ма эхь да-кх хьона, са дог, иззал ха йоаккхаш моастагIашта юкъе дахарах», — аьнна, ший паспорт эттIадаь Iокхессар цо. ТIаккха, тхогахьа хьа а йийрза, йистхилар: «Кавказерча бIухоша леладу гIулакх дайча, ма чIоагIа дега атта хул сона! Баркал хилда шоана, майра, дика нах!».

ТIема операцен юкъе шозза дакъа лоацаш, хиннав Хьасан. Шийна тIадаьхка декхараш кхоачашде ваха, мина эккхарах контузи хинна, букътIехк човхаяь, могаш воацаш ха яьккхай цо. Бакъда хIаьта а ший болх бита лаьрхIа вац из саг. «ТIема декхараш кхоачашдеш, дукха хала хIамаш нийслу. Массарел хьалха чугIерташ хиннача командирага хаьттар аз, валарах кхераций хьо, аьнна...

— МоллагIа хало цхьана токхаш латт вай. Валар мичча хана да йиш йолаш да вайга. ВIаший уллув хиларо, низ тел, — аьлар цо».
Денал долча нахаца Iа гIулакх леладеш хилча, эшшача моттиге тешаме новкъостий хул хьа. ВIаший барт хиларо дуккха хIама тоаду. МоллагIа, ше хьатIаийца гIулакх бехктокхаме дIахьош хила веза къонах! Даьхен гIулакха латтар, эггара дега мерзагIдола декхар да! Укх бетта 24-ча дийнахьа, 23 Росгварде болхло белгалвир. Цу дийнахьа «Майра хиларах» яха майдилг елар Доврбиканаькъан Хьасана а. Беркатеча хIаман тIехьа къахьегаш, ваха аьттув хилба цун дуккхача шерашка! Дала гIо деш вахалва из!