Нувхашцара къовсам
Ӏалам бӀехдара духьала ба мехкара кагирхой
Вайна гонахьара дуне хозагӀа лоаттадара тӀехьа, къахьегаш йола тайп-тайпара моттигаш я мехка. Дика гӀулакхаш доаржаде гӀерташ къахьег вай кагирхоша тахан.
Аьккхий-Юртара, Юкъерча Ачалкхера, бе доацаш, Ӏокхийса гӀишлон балхаш дечара совъяьнна нувхаш дӀаяха араяьннай къона тӀехье.
ЦӀечой Исроапила дика довз, Даьла духьа леладеш дола гӀулакхаш, цу мугӀаре къахьегаш хьавоагӀа из, хӀаьта эггара чӀоагӀагӀа цо терко ю экологен гӀулакха. Дешархой, студенташ юкъеозаш, «Хьаде» яха проект йоаржае аьттув баьлар цун дӀадахача шера.
Лакхе хьоахаяьча юрташка, кхаьч-кхаьчача Ӏокхувсаш йолча гӀишлон балхашкара совъяьннача нувхаша цун сатем боабаь дикка ха я.
Исроапила яхачох, духхьал моттигаш цӀенйича тоалургдолаш дац из гӀулакх, нувхаш дӀахо а Ӏокхувсаргья из гӀулакх Ӏомадаьраша. Экологен хьал, Ӏалам лорадар мел лоархӀаме да дувцаш, къамаьл дӀакхахьа деза бахархошца.
Дукха ха йоацаш дӀайихьача «ТӀаргам» яхача грантех латтача яхьашка, котало яьккхар «Турпалхой сомий бешамаш» яхача цун проекто. 420 эзар сом ахча луш, белгалйир проект кхелахоша.
Ше лаьрхӀар кхоачашде, Ӏаламах дог лазараш хьатехар Исроапила шийх.
300 саг юкъе волаш, дӀадахьа лаьрхӀача итт къахьегама шоатто 15 тонн совгӀа нувхаш гулъе тарлу вай мехкара.
ДӀахо, гаьнаш дӀайогӀаш, меттадоаладе деза нувхаш дӀакхийса доазош. 2,4 гектара тӀа 200 совгӀа сомий гаьнаш дӀайогӀаргья.
Даьла духьа гӀо деш леларий гӀулакх массанена гуш хургда. Дикал.Ру яхача порталага гӀолла гойтаргба цар болх. ЛоархӀамеча совгӀаташца белгалбергба эггара толашагӀбараш. Иштта дӀахьоча балхо шийна юкъеозаргба дуккхабараш.
«Турпалий сомий бешамаш» аьнна проектах цӀи тиллар дувзаденна да, проекта автор, экологен хьал дагадалларал совгӀа, кхувш латтача тӀехьенна луш болча кхетама уйла еш хиларца. Сомий бешамашка дӀачувоаллача йовза йиш хургья тӀема операцен доакъашхой цӀераш. Даьхе лораеш лаьтта къаман майра, сийдола къонгаш бовзар вай массане декхар долга хьагойт цу гӀулакхо.
«Вай дерригаш цхьа барт болаш, Дала хьаденнача хозача Ӏаламах дог лазаш хуле, йизза кхоачашхургья проект. Боккха болх дӀабахьа аьттув хургба, вай къахьеге», - аьлар ЦӀечой Исроапила.
2025-ча шера ахкан тӀеххьара бутт дӀабаьлча, гургда вайна вӀаштӀехьадаьннар. ХӀаьта, цига кхачалехь, грантех йолча яхьашка котбаьннарий дӀабахьа безар боккха болх ба. Теша лов, МагӀалбика кхалерча гӀишлон балхех йиса нувхаш дӀаяха кагирхой аьттув баргхиларах, цул совгӀа, кхы дӀахо нувхаш ца йоаржаяйта низ кхачарах.
