Кхерамзлен хьал
Керда яьнна светофораш оттаеш латт, вай мехкарча наькъашка
Мехка вахара-экономикан хьал тоадара тӀехьа лоархӀаме моттиг дӀалоацаш я светофор. ТӀехьарча шерашка дикка тоалуш доагӀа вай наькъашкара гӀулакх. Мехкарча моттигашта юкъера наькъаш шера, хоза да, ма паргӀата а я-кх иштта долча наькъашка гӀолла нах дӀа-хьа кхувла, моллагӀа хӀама дӀаяхьа.
ЧӀоагӀа лоархӀаме моттиг дӀалоац наькъашкарча светофораша. Ший ханнахьа Наьсаре е беркатеча юрта Буро кӀалха оттаяьча светофоро авареш кӀезигагӀа яйтаргья; вай бахархой лорабар, цар уйла яр да из.
«Кхераме доаца дика наькъаш» яхача къаман проектага гӀолла керда светофораш увттаеш латт вай наькъашка.
Ялх светофор оттаяьй «Наьсаре-МагӀалбик-Лохера Курп-Терек» яхача наькъ тӀа, Наьсарерча ГӀайрбик-хьажий цӀерах болча урам тӀа.
«Маьлхацарча батареяшца болх беш йола, ший тайпара сердал телаш йола светофораш я оттаеш латтараш. Белгалде деза, экономикан хьал теркалдича, из гӀулакх чӀоагӀа аьттув болаш долга», - йоах хоамо.
Светофор хиларо дикка аттачахьа доаккх наькъа йисте гӀолла мел лелача наьха хьал, кӀезигагӀа кхера безаш хул цар. ХӀаьта таханара машин, секунд ялалехь геттара сиха дӀаэккхийтта йиш йолча хана, чӀоагӀа эшаш хӀама да из. МоллагӀа саг гӀалатвала тарлу наькъал сехьавоалача хана, хӀаьта светофоро Ӏомаву хьежа, фийла хила, кхыбараш лархӀа.
Теркалде деза, къаман проектага гӀолла юрташка, шахьарашка дӀакхухьаш латтача балхо вай вахар дикка тоадаьлга, бахархой гӀадбигалга. Лакхача боараме тоадеш латт вай наькъаш, кхыдола доккхий балхаш дӀадахьа дезарашта а хоза масал да из! Вай мохк кхоачамбоацараш юкъе доацаш, массахана дегӀабоагӀаш, тоалуш латта безилга хьагойташ да из беркате гӀулакх!
