Хоаттам беш оаха тохкама болх дӀахьоча хана, маӀанах нийсбаланзар тхона, кхалнах мара. Царца хилар тха къамаьл. Оаха хаьттар; лор волча долхача хана фу хьал хул шуга, аьнна.

Тайп-тайпарча ханашка кхаьча кхалнах бар тхоца бувзаме хиннараш. Цхьанне аьлар, вай лорашта хала ма хеталда из, бакъда сайна могачох вайцигарча дарбанчешка ца аха хьож со, хӀана аьлча укхазара лораш дика хетац сона, цудухьа дарба массахана арахьа ду аз.

Цхьаькхане дийцар, чӀоагӀа озалуш, сайга цхьа во лазар да алар кхераш, хала тӀайода со лорашта, аьнна. ХӀаьта цхьан къонача йоӀа дог ловзаш аьлар: «Со-м кхерац цхьаккха хӀамах. Вай лораш сона-м дика хет, майрра тӀайода со царна». «Дега лазар долаш, дарбанчешка ухаш лел-кх со карарча хана», - аьлар саббаре цхьа беркате сибат долча юкъерча ханага кхаьчача кхалсага. - Сай болх АллахӀа дӀатӀабилла, Цох цхьаннех тийша йолаш, лелаш я-кх со тахан».

Вай кара из хилча-м, эггара дикагӀдар цамогаш цахилар дар, бакъда вай карара хӀамаш дац уж! ДегӀа могашал эшаеннаяле, шортта сабар, сатем, низ, киса дизза ахча хила деза-кх хьога. Из да-кх вай кийчде дезар.

Цамогаш хиннача хӀара сага никъ цхьан тайпара дӀаболалу. Эггара хьалха участкови терапевта тӀадолх вай. Унахочунга хьеже, ладийгӀе, дӀахо кхыча лора, цхьайолча хана массехк лора дӀатӀахьожаву цо. Цу юкъе, массайтта анализ дӀачулуш, кхыйолча моттигашка чакхвоалаш, дикка го баккха беза хьа, хӀаьта цу дерригнех шортта ахча Ӏодилла деза. Юххера а, из деррига кӀордадийя, са кхоачаденнача сага хеталу; фу де деза ер деррига, хӀаьта а юххера лергволаш хилча, аьле. А-а, ма алалахь! Вахаро шийдар хьагойт! Баьца мергӀилгах тоссалургва хьо, кхы цӀаькха са даккха дагахьа.