Республикерча кулгалхоша ИнгГУ филологически факультет хиннача къоастаяьй цу гӀулакха моттиг. Иштта доакъашхошта тела алапи а, Роскагирхой яхача оагӀоно из моттиг тоае ахча хьожадир. 

1000 эзар совгӀа кв. метрага кхоачаш да из доазув, дукха тоабаш, проекташ йоаржае аьттув хургба цига. Таханарча хано дӀадеххача тайпара тоадаь да цу чу мел дола хӀама, цунга хьежжа дукха кагирхой тӀалатташ доазув хургда из. Тайп-тайпара кхетаченаш, лекцеш, боламаш дӀакхахьа йиш хургья цига.

60 сага моттигаш луш йоккха зал, кхетачеш дӀакхухьа зал, оаз дӀаязъеш йола студи, иштта кхыдараш а да цу чу. ХӀаьта эггара лоархӀамегӀдар, из моттиг массанена йийлла йолга. Цига кхетаченаш дӀахьор лаьрххӀа цхьан моттиго хьожаваь воагӀаш хила везац, нагахьа хьона дагадехар пайдане, беркате хургдолаш дале, хьай кхетаче, проект дӀаяхьа аьттув хургба хьа.

МоллагӀа йола проект вахарца ювзаенна, кагирхой хьал тоадара тӀехьа йолаш хила еза. Кагирхой ЦӀагӀа тахан хьадийлла болх беш да доккхий кагирхой оагӀонаш - «Къона эскар», «Хьалхарчар болам», «Коталон волонтёраш», «CyberCaucasus League», «Къамашта юкъерча барта клуб». Ерригаш а 18 моттиг я, царех хӀара моттиго шоай боламаш, кхетаченаш дӀакхахьа йиш я цига. Кагирхой ЦӀа хилалехь, кагирхой гӀулакхех йолча комитета кабинеташка дӀакхухьар цар шоай болх.

Иштта юкъарча моттигашта а боккха аьттув луш да из моттиг хьаеллар, хӀана аьлча массане низ дӀакхачац ахча телаш моттиг лелае. Кагирхой политикан наькъ тӀа боккха, лоархӀаме гӀа ба из. Белгалде деза, кагирхой вахара хьал тоадара карарча хана мехка боккха болх дӀахьош латтилга, дукха дика хувцамаш юкъедоаладаьлга.