Дукха шераш хьалха, со кхувш воагӀаш, цхьа боккхий нах накъабоахаш вар со, цу хана атта доаца сурт бӀаргадайра сона. Тхо дар, къаьнарча мухь кхухьача машинаца, кӀоаргача орал дехьадала дезаш, тхона хьалхашка уллар, хано йохаяь, тишъеннача бетона ши Ӏоакъа.

Нах берригаш а машина чура Ӏобаьлар, халача балийца, шорттига цу бетона Ӏоакъаш тӀагӀолла дехьабаьлар уж. Е хьалаца гонахьа карт а яцар цига, е кхерамзлен Ӏалашо а яцар, цхьа тӀий хилара тара болаш гӀирс бар… Цу тайпара дега Ӏоткъам беш йола моттигаш ГӀалгӀайче дукха а яр. Кхален керттерча моттиго гаьнарча юрташта терко кӀезига лоаттайора, тӀаь хьисапе гӀишло хьалъярах-м дувца а эшацар е сатувсилга а дацар.

Ираза, таханара сурт кхыча беса да, сага дог гӀоздоаккхаш. ГӀалгӀайче хьалдеш да тӀаьш, дика а чӀоагӀа а да уж, машинаш а нах а паргӀатта тӀехбалара лаьрхӀа даь.

«Кхерамзлен дика наькъаш» яха къаман проект кхоачашъеш, федеральни Ӏаьдало моттиг хьаллоацаш хиларо дика толамаш даха таро хилийтар. Цу тайпара наьха вахарера хьалаш хиларах, республикан бӀаьш, эзараш болча бахархошта, хьаьшашта новкъостал хургда.

ТӀий хиларо таро лу моллагӀа дола этта хьал дӀадахьа, наха юкъе бувзам лелабе, доазон тӀара кхыдола вахарера лоархӀаме хьал дегӀадоаладе. Цу тайпара гӀирс хьалбар лоархӀаме да вахара, экономически оагӀонаш кхоачашъеча.

Ший хана, Эбарга-Юрта хьалдаьдар доккха тӀий, цо дика таронаш елар наха, кхераме а доацаш, цу тӀагӀолла шоай гӀулакхаш доахаш лелалу, цул совгӀа, республикан кхыча юрташца бувзам лоаттабе аьттув боал.

ДагадоагӀа, цу моттигашка хи тӀа зӀанарех хьалъуллар гӀашлой аьшка тӀий. Юххьанца, цу тӀагӀолла тӀехвала эттача, моллагӀа волча сага кхераме хеталора. Бакъда, бӀаьсти доккхий хиш доагӀача хана, цу тӀагӀолла тӀехвалар геттара боккха салоӀам бар, унзара хьалаш дезаш болча цхьабарашта.

Иштта тӀехьарча хана хьадир, вай Шолжа-Шахьара хи тӀагӀолла дукха дика хӀама дӀадахийта керда тӀий, цунга иштта дукха паччахьалкхен ахча а дӀадахар.

Дукха ха йоацаш хьалдаь даьлар Илдарха-ГӀалан тӀий а - из лоархӀаме да мехка гӀишлошта юкъе.

Карарча шера, Эккажкъонгий-Юрта тоаде лаьрхӀад ах бӀаь шера латташ дола доккха тӀий. Цу тӀагӀолла дукха машинаш, нах тӀехбувл.

МоллагӀа йола инженерни гӀишло наха эшаш а лелаеш а я ден-бус. ТӀий - из я нах лела моттиг, дукха адам тӀалатта кӀаьд. Хетаргахьа, хӀара кхален, юрта, шахьара Ӏаьдало цу тайпара гӀишлош йола е хургйола моттиг, тӀаьш дола доазув хоза, доал даь, наьха безам тӀабодача хьале леладе доагӀа.

Лакхе белгалъяьхача е кхыча гӀишлошка говзанчаша, болхлоша цхьадола инженерни балхаш кхоачашде дезаргда. Шеко яц, тӀаьш техкаш дола балхаш деш бараша шоашта хьалхашка оттадаь декхараш кхоачашдергхиларах.

Тахан дукхагӀа болча вай бахархоша оал, карарча хана Ӏодехкаш латтача наькъашта, хьалъеш латтача гӀишлошта мах оттабеш: «Из хоза а дика а даьд. Наха лаьрхӀа даьд из!»

Вай тахан сихденна чудолхаш е балха долхаш; хоза тиллача тӀаьх тӀехдувлар лоархӀаме да. Цхьайолча хана, наькъа кхерамзле лораеш моттиг нийсъелча, баркалца мах оттабе беза вай, цхьан берда тӀара вокх берда тӀа кхача аьттув хилара.