«Юртбоахама гӀулакхах йолча министерствон болхлоша белгалдечох, федеральни оагӀонцара цу гӀулакха хьожадаьр 93, 388 млн сом ахча да, моттигерча оагӀонцара - 943 эзар сом ахча. Цу ахчан юкъера 50,7 млн сом фермерий оагӀув хьаллоацаш, юрташка из гӀулакх дегӀадоаладеш дӀадахийтад. Ахархой, фермерий боахамашта гранташца гӀо деш даь новкъостал да укхаза дувцар. 42,7 млн сом хьожадир цу лостамагӀа къахьегарашта, цар дайначох ах меттаоттадеш. 900 эзар сом къоастадир юртбоахамера коопераци, фермерий оагӀув хьаллаца. Паччахьалкхено новкъостал дир 95 ахархой-фермерий боахамашта, юртбоахамера беркат доаржадеча ворхӀ кооперативанна», - хоам бу Мехкадаь, республикерча паччахьалкхен зарбан болх лелабераша. ДӀадахача шера доккха гӀо лоаттадир вай паччахьалкхено боккха боаца юртбоахам лелаберашта а. 103,1 млн сом субсиди хьожадаьдар цу оагӀон лаьрхӀа.

Ахархой къахьегаме тайп-тайпарча боараме хӀама хьадеш барашта, проекташ йоаржаеш дӀадахийтар из ахча. Эггара керттерчарех да ала мегаргдолаш да, дезала фермай оагӀув хьаллоацаш гранташ ялар. 65, 2 млн сом ахча дӀадийкъар 51 дезала ферманна юкъе. Шоай болх дӀабахьа эшаш мел дар Ӏалашде аьттув хилар цу мугӀарерча къахьегамхой. Йоккха терко йир юртбоахамерча кооперативашта. 37, 9 млн сом ахча хьожадир царна, хьахулаш дола беркат ма хулла дикагӀа, дукхагӀа хилийта лаьрхӀа.

Мехкарча паччахьалкхено шийна хьалхашка оттадаьча керттерча декхарех да, республикерча юртбоахама хьал ма хулла тоадар. Белгалде деза, цу хьахьожадаьча ахчо боккха аьттув бенна, дуккхача хӀама хьадеш къахьегарий шоай болх тоабе таро хиннилга. Гранташца гӀо даро ахархошта аьттув баьлар шоай балха тӀа эшаш йола, тӀехьарча хана яьнна хӀамаш эца, дӀадувш дола ялат дикагӀа хьувкъаргдолаш мел эшар кхоачашде, цунга хьежжа дуккха дукхагӀа беркат чуэца. Субсидеш бахьан долаш, Даьла къахетамца, къахьегаш боахкарий шоай хьал тоаде аьттув хилар.

«Юртбоахам вайна чӀоагӀа лоархӀаме ба, унахцӀена кхача боаржабе йиш хиларах. Тахан доккха новкъостал лоаттаду цу лостамагӀа къахьегарашта», - белгалдаьд вай мехкадас Келаматанаькъан Махьмуд-Ӏаьлас. РФ президентагара, паччахьалкхенгара хьадоагӀа новкъостал тахан вайна боккха толам луш да. «ЗӀамига а доккха а шоай хӀама леладу моттигаш дегӀакхувлар» яха «ЗӀамига а доккха а шоай хӀама леладар» оалача къаман проекта чуйодача федеральни проектага гӀолла, вай тахан аьттув ба юртбоахамерча хӀама хьадеча моттигашта доккха новкъостал лоаттаде, цар болх дикагӀа дӀагӀоргбар юкъекхувла. Юрташка къахьегарашта гӀо лоаттаде хьож вай тахан.

Цу гӀулакхо унахцӀена кхача хулийт республике». Мехкадас белгалдаьчох, вай кхетаду, программашка гӀолла дӀабихьача балхо вай мехкá дикка пайда баьлга, наха керда балха моттигаш Ӏалашъяьлга. Бакъда хьахинначох кхоачам хинна Ӏе йиш яц вайга.

Могаш дола гӀо де деза ахархошта, керда проекташ йоаржаеш къахьега деза. Вай массане кхетаде деза, хӀара дӀадахийтача сомо республиканна боккха пайда бергболга. Вай мехкахошта массайолча ханашка лайнад лаьттанца къахьега, къахьегарга хьежжа хиннад хьахулашдар а. Юртбоахама гӀулакх, хьаллоацаш, дӀадахьа дезарех да. Из оагӀув боаггӀача боараме теркалбеш, хьинаре, безамца къахьегаш вай дӀадолхе, воаш хьакхедаь унахцӀена даараш хургда вайга, цунга хьежжа, кхыйолча моттигий хьал а тоалургда.