Аьттон низ
Хам баь варгвоацаш да, вай мехка спорт яржар
Спорт эш, вахаре наьха унахцIено лорае! Таханарча дийнахьа, вай республике даггара тоадеш латт спорта хьал. Ма дарра аьлча, спорт езарашта аьттув бараш дукха да. Из хьал тоадеш латт, гаьнна ядача юрташкара денз. Спорта гIулакхах йолча министерствон кулгалхочо, вай Мехкадаьца къамаьл деш, белгалдир; «Магас» яхача спорта Дворецера ФОК ший болх бе йолаеннай, аьнна. Кхалнаьха, маIача наьха къоастадаь денош долаш я цигара бассейн. ДегIа могашал эшаеннача наха аттагIа хургдараш а юкъедоаладаьд цига. Нек де ховш воацар, цу гIулакхах болча говзанчаша Iомавергва.
Укх шера, тайп-тайпара йола 170 спортивни кхетаче дIайихьай мехка. Спорт езараш хIара денна дукхагIа хулаш латт. Цу гIулакхо дикка тоам бу дега. Вай кагирхой унахцIена долча вахара тIакхувш хилар да из. Туризмаца, физкультураца, спортаца бувзам лелабеш дIадолхе, боккха пайда баргба вайна массанена. Сов чIоагIа тоабенна болча, дегI массахана мекъа долча наха геттара эшаш да из гIулакх. Бера хана, нах гулбеннача моттигашка, шиъ-кхоъ геттара текха нах зувра аз, хIаьта хIанз-м геттара дукха ба цу тайпара нах. ДIаяхача хана, вIашагIбетталуш, цхьацца тренировкаш, балхаш леладора наха, дегI мукъадалийта. Цхьана деш дола моллагIа хIама безамегIа хул. Дика дар, тахан а из юкъедоаладича. МоллагIча сага ваха, ва атта хургдолаш; хила еза спортацара моттигаш. ТIаккха наьха чам а дикагIа хул цу гIулакхаца.
Федеральни наькъа юхе Iойилла Буро кIалхара стадион дагайох сона... Эггара чIоагIагIа малх тIалаттача, цхьаккха сага хIама де догдоагIаргдоацача моттиге Iойиллай из, дуккха шераш хьалха. Иштта латташ я-кх из тахан, шийна тIехьа дуккха хаттараш долаш. Мел боккха пайда хинна хургбар цу моттигах, ший йила езача моттиге из Iойиллаяларе. Из мо дола хIама, шахьара, юрта бахархошца бувзам болаш де деза. Къоначун, къаьначун цига ваха догдоагIаргдолаш, безам тIаозаш хила еза спортацара моттигаш. Саг чу ца водаш, латтача моттигах хила пайда бац.
ДукхагIболча наха дика хов, шоай дегIа зе дергдараш малагIаш да; бакъда, пайда боацача хIамашка шоай са Iехадайташ, дIалел уж, зе деш яле а, дегIо дIаехар Iочуюаш, цунна товр деш. Вайна хов, боарамал тIехваьнна тоавенна волча сага дегIаца дукха лазараш гучадоалилга. Мекъал котйоал, цу тIагIолла, деррига а дох... Иштта вахар харцахьа да! Ха кIеззига гаьнаяьлча, дивана тIара хьал ца гIотташ, пайда боацача киношка хьежаш, боарам боацаш хIама дуаш, баха ловш хул цхьаццабараш. Цу наькъо хьатIадоах наха лазараш. Ший дегIа доал деш, хила веза саг. КIира цкъа мукъагIа коа, беша болх беш, дегI хьоадеш хилча, саг кадайгIа лел. Деррига а ший боарам болаш хила деза.
УнахцIенон дикагIдар, дегIа эшар да вай лораде дезар. Вижа уллача, хайна вагIача сага дегIаца низ дукха хилац; цудухьа, гIа боаккхаш, маьже хьоаеш, из деррига а безамца леладеш, хила деза вай. Чемпион хила гIерта везилга дац вай дувцар, дегIа доал дар да. Уйла е цу хIамай! Сага ше лорадича, доал дича мара могаш хилац дегI!
