Яндарерча культуран цӏагӀа дӀайихьа кхетаче хетаяь яр моттигерча дешархоша. Цига дакъа лоацаш хилар Наьсарен кхален терроризма духьала къовсам лоаттабара йолча комиссе секретарь Хьоашаланаькъан А., юрта администраце кулгалхо Лоалахой Т., исторе хьехархо Султиганаькъан Х., полице лейтенант, даькъ тӀара болхло Хамхой А., къоаной.

БоккхагӀбараша дийцар, терроризм яхар фуд а шоаш деча зуламашца цар фу юкъедоаккх а, террористаша мел доккхий халахетараш наха лоаттаду а, цу юкъе дагаехар 20 шу хьалха доккха хатар хинна Берса-Юрт, цига бехк боаца дукха нах боабаь хилар.

Кхетачен доакъашхошта дагаухар, террористаша даьча зуламах байна шоай юртхой, терроризм юхатохаш байна бокъонаш лораю болхлой, царна карагӀдаьннар дувцаш ха дӀайихьар.

«Терроризм-из адамашта духьала зулам дар да» яха тематически сахьат дӀадихьар Алхастерча культуран цӏен болхлоша моттигерча ишколе-берий беша. Кхетаче дӀахьош хиннача ЗагӀенаькъан Адама, Булгучанаькъан Зейнапа белгалдир, терроризма духьала къовсам лоаттабара болх дӀабахьа безаш хилар. Дешара улга тӀа хьагойтача сурто хьалхадаьккхар берашта, цхьана хилча мара цу бӀехача гӀозара духьалъотталуш хургвоацилга.

Гӏажарий-Юртарча культуран цӏагӀа терроризма духьала хилара Ди дӀахьош, кхетаче хилар №№ 1, 2, 4 йолча ишколай дешархой, ГӏалгӀайчен МВД ветераний Совета  кулгалхочунца Котанаькъан Мухьмад-Салеца; иштта Шолжа кхален, Илдарха-ГӀалий тӀагӀолла йолча Российски ветераний союза отделене кулгалхочунца Йовлой Ювсапаца.

Укхаза лоархӀаме къамаьл хилар тахан вай мехка хьалхашка латта хьал дувцаш, деррига къам цхьана хила дезарах, российски юкъарлонна декхар из хиларах дийцар гулбеннараша. Цу кхетаченна хетабаь культуран цӏагӀа гойтам бар, цига хьагуш дар терроризма ийрча гӀулакхаш.

Наьсарен кхален культуран цӏен тоабо «Террор-бӀаьшерен кхоачамбоацар» аьнна цӀи йола тематически программа кийчъяьяр шоай дешархошта. Кхетаче дӀахьош белгалдир, терроризм - адамлен хьалхашка нийсденна доккха кхоачамбоацар хилар. Цо дохаду наьха вахар, гонахьара мах болаш дар, юхахотта йиш йоаца цӀена гӀулакхаш. Террористаша деш долча зуламаша наьха дегаш дохаду, сага низ тӀабахьарал совгӀа, керта чура уйлаш кегаю, психологически човнаш ю, дукхача шерашка цу хьалах могаш боацаш бус из чов хиннараш.

Кхувш йоагӀача тӀехьенна хьалхадаьхар террористаша даь доккхий зуламаш, укх тӀехьарча шерашка вай мехка мел нийсъенна унзара моттигаш, - Пятигорске, Каспийске, Буро тӀа, Москве, Буйнакске, Буденновске, Кизляре, Наьсаре, Берса-Юрта, Санкт-Петербурге. Берашта дийцар теракт еш хилча ха дезар, иштта чоалханерча хьалашка нийсвелча кхерамзлен Ӏалашо хургйолаш де дезар.

Долакха-Юртарча культуран цӏен болхлой бахар цу дийнахьа моттигерча юкъарча дешара ишколе, цига дӀайихьар «Тхона дагабоагӀа беррига бейнараш» аьнна вӀашагӀъелла кхетам балара моттиг. Цу юкъе дакъа лоацаш бар ийслагӀча классе багӀа дешархой, СВО даькъ тӀа шоай денал хьагойта бӀухой, Даьхе лораяри кхерамзлен хьалаши хьехаш вола Манкенаькъан Муса, дин хьехамаш деш вола Геласханаькъан Башир.

Культуран-салоӀама моттига исбахьален кулгалхочо Манкенаькъан Зинас бийхабар лакхехьарча классай дешархой, герга истол дӀахьоча дакъа лаца, граждански юкъарло вӀашагӀйоллара тӀадерзадаь дар цига хинна къамаьл.

Терроризмаца къовсам лоаттабара цхьоагӀон Ди долаш, цу зуламах байна нах дагабохаш хиларах тарра, Кердача Реданта культуран цӏен дешархошта дийцар, вай мехкарча бахархошта карагӀдаьнначох, спецназа бӀухой деналах, уж терроризма духьалъотташ хиларах.

Хамхой Ӏашата кулгал а деш, дешархоша Ӏомайир кхерамзлен бокъонаш, нагахьа санна теракт хилар кхерам болаш моттиг нийслойя, полице мишта хоам бе беза хьалхадаьккхар царна.

ЖӀайрахьарча культуран цӏен методиста Харсенаькъан Аминас, исбахьален кулгалхочо Лаьнанаькъан Радимхана, Лаьнанаькъан И.С. цӀерагӀча берий беша-ишколе берашца цхьана кхетаче йир. Из хетаяь яр Берса-Юрта террористаша даь хиннача хатара.

Цу кхетаче дакъа лоацаш бар Жӏайрахьа кхален администраце викалаш Боранаькъан Муса, Лаьнанаькъан Рамзан, полице болхло Чуранаькъан Ахьмад, дина хьехамаш деш а истори хьехаш а вола Шовхаланаькъан  Назир.

Берашта гойтар, террористаш Берса-Юртарча ишколе чухьелхача, из дӀалаьцача хана, цига унзара Ӏазап оттадаьча хана яьккха материал. ВӀашагӀкхетар хетадаь дар кхувш йоагӀача тӀехьенна мах бараш довзийтара, царна во а дика а къоастаде ховргдолаш, дикача хӀаманна уж тӀехьабахара.

«ЛоархӀаме да хар, терроризмаца къовсам лоаттабаь Ӏе йиш яц, из хьахьовргйоацаш юхатохаш а хила веза», - аьлар из кхетаче вӀашагӀъеллараша. Берригача наьха бокъо я  сатеме, машаре баха, воайла безаме, лерхӀаме хиларо мара, терроризм дӀа-юха ца яржийтара тӀехьа вай аьттув боаккхаргбац, вай дӀагойта деза, цӀаккха а зуламхой хьаллоацаш воаш хургдоацилга.

Вай дерригаш а харцо лелаерашта духьала хила деза, терроризм, экстремизм яржаргйоацаш духьале лоаттае еза, дерригача адамий сийрда вахар лорадара, тахан а кхоана а кийча хила деза.