«Кхоачашъе лаьрхӀа проекташ, программаш дийнъеш болх дӀабахьа беза, из оагӀув байза ваьлча. Де дезарех кхийттав со, керттердар- гонахьара новкъостал, оагӀув хьаллоацаш хилар. БоаггӀача боараме деррига дӀадахьа аьттув хургба, аьнна, хет сона», - белгалдир цо.

Таханара хувцамаш теркалдеш, ма дарра аьлча, дуккха дикаш доаржаде, доккхий гӀулакхаш кхоачашде аьттув баьлар, кердача новкъа даьнна шортта беркат дебаш, дӀадолхаш латт вай тахан.

Мехкадас хьагойтар массанена, геттара хала да аьнна хетараш а, сих ца луш, дикагӀа хургдолча тайпара кхоачашде шийна ховлга. Республиканна кулгал деш болча боккхача, атта боацача наькъ тӀа валале, дикка ха йоаккхаш арахьа ваьхавале а, ший къаман наьха нигат, цар керттерча уйлашца дувзаденнараш, царна дагадоахкараш дика довзаш вар Келаматанаькъан Махьмуд-Ӏаьла.

Ма дарра ала велча, ший болх, хьалаьца никъ дика бовзаш вола, ше дер бехктокхаме чакхдоаккхаш хьавоагӀа воккха кхолламхо ва из. Вайна массанена дайнад республикера экономически оагӀув телха лаьттача ханара хьал, ма даггара даржаш лаьтта кхааш ийдар. Хетар, из гӀулакх иштта атта, сиха тоалургдац, аьнна. Эггара хьалхарча аргӀагӀа нахацара бувзам чӀоагӀбир цо, царна фу хет, дагадоахкараш тохкаш. 

Ӏаьдала болхлошта а тӀадиллар; бахархошца бувзам лелабеш бе болх, аьнна. Дуккхача адама чӀоагӀа новкъостал хулаш йола, боккха пайда боаржабаь Къаман ганз хьаеллар хьаллаьцар цо. Из деррига мишта накъадаьлар дайра вайна, ковид яха лазар даьржача хана сихонца молхаш лоаттае. Бахархошта гора, Келаматанаькъан Махьмуд-Ӏаьла хӀаранех дог лазаш, хӀаране уйла еш волга. Цох хьахиннар теркалдир вай Украинерча наха новкъостал гулдеча хана, Палестинерча мискашта хӀамаех етта машенаш йохьийтача хана.

Ше кулгал деча юкъа, хӀара оагӀонцара кхоачамбоацараш теркаме лоацаш, дукха низ тӀабохийташ республикера хьал аттачахьа даккха гӀерташ хьавоагӀа из. Вайна хов, дуккхача хана денз пайда беш йоацаш сайца лаьтта моттигаш болх бе дӀайолаеннилга, тахан беркат доаржадеш латтилга. Пхе шера кулгал деш, цу сага Даьла къахетамца кхоачашдаьраш кӀезига дац. Къамах дог лазаш, нах безаш вола кулгалхо ше волга дӀахьекхад цо ден, бус къахьегаш. Тешаме, доал де ховш вола саг из волга зийнад РФ Президента Путин Владимира. РФ мехкашкарча кулгалхошца бувзам лелабе, доттагӀал хотта, юкъе беркате дар доаржаде хов цунна. БоаггӀача боараме рузкъа хьожадеш, мехка тӀалаьтта декхараш дӀатокхаш, болх дӀахьош хьавенав, ше кулгалде эттача дийнахьа денз.

Наьха вахара хьал тоадар, геттара чӀоагӀа халача хьале латта хицара гӀулакх аттачахьа даккхар керте оттадаь, боккха болх ба тахан кхоачашбер. Мел хоза, ма дарра аьлча, йовзаргйоацаш тоаеш, куц хувцаш латт вай мехкарча юртий, шахьарий. Хьалъеш латт керда дешара моттигаш, тишъеннараш тоаеш болх дӀахьош боахк. Мехка хьал тоадара тӀехьа кхоачашдаьраш дукха да. Эггара керттердараш дикка тоаде аьттув баьннаб, хӀаьта дӀахо дӀабахьа беза болх а кӀезига бац. Массане дегашта тоам беш ба, юртбоахама оагӀув хьаллоацаш, цу мугӀаре къахьегарашта дикка новкъостал лоаттадеш, дӀахьош латта болх. Машинаца республике гӀолла чакхдоалаш; зув вай; селхан докъаденна, пайда беш доацаш даьда лаьтташ къонача ялатах дизза латташ.

Коарча боахаме къахьегарашта юкъе, Мехкадас оттаяьча яхьаша дуккха бахархой хьинаре къахьегара тӀехьа сомабаьхар, вӀалла хӀама леладеш боацараш а, цунца чам болаш, шоай коа беркат доаржаде эттар. ТӀема доакъашхошта, цар гаргарча наха доккха гӀо лоаттадеш, цар хьашташ кхоачашдеш, эшар-дезар тохкаш, царца кхетаченаш дӀакхухьаш, хьавоагӀа мехка кулгалхо. Уж деррига дикаш тахан наха зувш, доккха баркал оалаш да. Доккхача дикаех еций даггара хьалъеш латта керда дарбанчеш, ишколаш, ФАПаш, спорта майдаш; сайца лаьтта фабрикаш, заводаш юха болх бе дӀайолаялийтар, иштта кхыдараш а.

Укх шерашка Келаматанаькъан Махьмуд-Ӏаьла, паччахьалкхе, парламент, министерствош укх мехкара хьал аттачахьа даккха гӀерташ, болх беш хьайоагӀа. Бахархошца кхетаченаш еш, царна къувлачунга ладувгӀаш, цар хьашташ теркаме лоацаш, дог лазаш бола къахьегамхой шийна уллув гулбеш, Мехкадас дӀахьош никъ ба из. Вахара хьал тоадала доладелча, адам а дикка деба долалулга зийнад вай. РФ мехкаш хьаийцача, эггара дукхагӀа ха йоаккхаш нах баха, адам дикка дебаш йола республика я вайяр. Хьай мохк дикка тоалуш латтилга зийча, кхоане сийрда хургхиларах а теша лов; хӀана аьлча тахан хьабахьача наькъага хьежжа хургда кхоанара вахар, хӀаьта вайна массанена гу, из никъ ма хулла беркате, къахьегамах бизза хилийта гӀерташ, хьалхалаттачо къахьегилга.

«Сердало» газета болхлоша даькъалавувц Келаматанаькъан Махьмуд-Ӏаьла цу денца. Иразах, аьттонах, дикача гӀулакхех дизза хилда цун вахар; могаш, маьрша волаш воахаволва из АллахӀа вай къаманна!