Цун къахьегама лакха мах бир
ГӏалгӀайчен говзанча Саха (Якуте) Республикан унахцӀенон дикагӀа йола болхло я
Ший вахара никъ гаьнарча Якуте дӀабахьа безаш хилар Тутайнаькъан Аьсета цӀерагӀча ГӏалгӀайчен лорий колледже дийша яьнна Тоаркхой Беслана Зара. Ший дезалца цхьана цига професси а караерзайир цо.
М. Е. Николаева цӀерагӀча Къаман центра барт болча къахьегама тоабо, дика хеташ, тӀаийцар из. Тоъал ха я цо цига болх бу, ший болх безаш а наха езаш а я из.
Дукхача шерашка цо хьийга къа ца зувш дисанзар. Дукха ха яц Беслана Зарайна лакхара совгӀат денна - «Саха (Якуте) унахцӀенон гӀоръянна болхло». Из совгӀат Тоаркхой Зарайна делар; цӀаккха а кӀаьд ца луш, цо дика къахьегарах, ший гӀулакх дезаш хиларах.
Цо дӀахо а цу даькъ тӀа лакхлуш къахьега лерхӀ, шийна ховш дар гонахьарчарца декъаш.
Тоаркхой Зарас яхачох, цун дика коллектив а нийсъеннай, безамца тӀаийцар из шийна уллуврча лораша, цо дӀахо а Ӏомаю Якути, цунга гӀолла наха дӀайовзаш йоагӀа ГӏалгӀайче, вай къам.
Беслана Зара дукхача берий нана я. Из хьож ший дезала гӀалгӀай культуран лоархӀамедараш хьеха, моттигера нах, цар культура езаялийта.
