Ше беча балхах чуийнна воаллача сага сакъердалу цу хӀаман бесаца, цун хӀара оагӀонца… ЦӀихеза суртанчаш, скульптораш, архитектораш, дизайнераш массанех ца хуле а, сага ший кулгашца хьакхеллача хӀаман лакха мах оттабераш цкъа корабоагӀа. Цхьаболча кхолламца вахар хеттача; наха гонахьарча Ӏаламца, дуненца, адамашца къамаьл деш дӀахьу шоай болх.

Ший яьннача ханага, начӀалга хьежжа хорж хӀаране из гӀулакх. Къонабараша, вӀалла хье ца луш моллагӀа хӀама дӀадоладу, хӀаьта боккхагӀбараша хорж къаман юкъе тхьовра денз чӀоагӀденна латтараш, массанена хозахетараш. Цу балхацара керттердар - леладеча хӀамо хьа дега тоам беш хилар, цунга гӀолла хьай уйла-нигат гойтар.

ЧӀоагӀа догдикача, беркатеча сага кхеллача хӀамаех диза да са цӀа. Геттара чӀоагӀа цамогаш йолаш даьд уж балхаш Дзейтанаькъан Хадчата. Шийгара хьал мел хала хиннадале а, гонахьара хозал гойташ долча балхашцара безам лаьгӀбеннабац цун. Камаьрша дӀадекъар цо уж массанена: гаргарча наха, лоалахошта, ишколашта, берий бешамашта. Шийна санна наха а ше кхеллар дезадалийта гӀертар из.

«Айса лелабеча балхо сайгарча лазара уйла яйтац сога, пӀелгаш массахана болх беш хилар лоархӀаме да сона. Цхьаккха хӀама деш воацаш, вагӀаш хилча; керта чу ца йоагӀаш уйла хилац, цу хӀаманга се дӀа ца лацийта пайдане, беркате хургдар кхоллаш къахьега лаьрхӀар аз», - дийцар сога Хадчата.

Интернете гӀолла Ӏомабир Хадчата ший болх. Тайп-тайпарча хӀамаех хьадаь истола тӀа лоаттаду цхьацца гӀирсаш: кӀопилкаш, совгӀата тела хӀамилгаш, зизай паннош. ТӀехьарча хана Хадчат джутах хӀамаш хьае йолаелар, из говзал сиха караерзайир цо. Тикашка нийслургйоаца чӀоагӀа тамашийна, ший тайпара хоза хӀамаш я цун кулгаша хьакхеллараш.

Йоккха дегагӀоз луш хилар цунна из болх, чӀоагӀа сакъердалора цун тайп-тайпара хӀамаш хьаеш. ХӀаьта, геттара тоам беш дар, цо хьакхеллар наха хоза хеташ хилар. Беркате, сийрда лар шийна тӀехьа йита дӀаяхар Хадчат. Дуненцара къаьстачул тӀехьагӀа, наха хьо хозача дешаца дагалувцар хам баь варгвоацаш да.

Дуненцара, кхолламцара безам, сийрдача хӀаманга кхача гӀертар дӀахьокхар цо ший балхаца. Халонашта духьалъотта, даиман кхоачамбоацарий уйла еш ца ягӀа гӀо дора цун цу оагӀоно. Гонахьарча наха ше хьакхеллачун лакхара мах оттабича, шийца бувзаме баьлча, чӀоагӀа гӀадйодар из.

Хозача хӀаманга уйла кховдаеш волча сага гонахьара дуне цӀена, хоза хилар лов, из гойташ хул цо хьакхеллар а. Вайх хӀаране цхьа декхар да - пайда беш, беркат доаржадеш дахар. Цо тел вайна доккхача дикашка кхача низ! Кхолламца бувзам лелабу нах цхьа тамашийна, сийрда уйлаш йолаш хул, кхычар ца зувш дола хӀамаш теркалдеш хул цар хьакхелла балхаш.

Уж нах вайна юкъе бецаре, иштта диза хургдацар аьнна хет вай вахара денош, гонахьара дуне. Кхолламца къахьегараш бецаре сагота, массадола денош цхьатарра хетаргдар адамашта.

Сийрдача басарашца вай вахара денош тоадераш, хоза хӀама теркалде вай Ӏомадераш, массахана дахаргдолча беркатеча хӀамай хам байтараш, кхоллама наькъ тӀа къахьегараш, шоаша леладечунца сакъердалураш ба!