«Вай дерригаш а россиянаш да - хьамсара ГӀалгӀайче, Росси езаш да. Из вай дӀагойт хӀара денна, Даьхенна тӀехдика гӀулакх деш хиларца», - аьлар ГӀалгӀай Республикан кулгалхочо Келаматанаькъан Махьмуд-Ӏаьлас, ше къамаьл деш.

Цу дийнахьа, республикан, мехка кулгалхоша лакха мах бир тайп-тайпарча даькъошка дукхача шерашка хьинаре къахьегаш хьабоагӀача наха карагӀдаьннарий. Из яр республике дика йовзаш йола ГБУЗ «Шахьара поликлиника» керттера лор, хӀанз Российски Федерацен цӀихеза лор Горчхананаькъан Тамерлана Тамара.

ГӀалгӀай Республикан Паччахьалкхен кулгалхочун хьалхара заместитель волча Фурсов Олег Борисовича Российски Федераце Сийлен грамота елар.

«За заслуги» яха орден елар Зортанаькъан Мусай Мадинайна, из я «Театра, кино, таханарча заман хьалий центра» кулгалхо.

Цу дукхача, дикача наха юкъера кхо саг мара вац аз хьалхарча аргӀагӀа хьоахаваьраш. Цу дийнахьа дуккхабараш бар совгӀаташца белгалбеш, уж бар лораш, тренераш, паччахьалкхен гӀулакхаш тӀара нах, начӀал дола артисташ, хьайбай лораш, журналисташ. Царех хӀаранех къаьстта дувца йиш йолаш а дувца доагӀаш а да.

«Сона йоккха дегагӀоз я ГӀалгӀайче иштта дукхача начӀал долча нахаца белгала хилар, цар шоай хьинар, низ дӀалу тайп-тайпарча балха доакъош тӀа, уж ба лакха балха говзал йола, шоаш каралаьца болх дика дӀахьош бола нах»,-аьлар Махьмуд-Ӏаьлас.

Из уйла цунца цхьана йолаш бар цу дийнахьа, вай хозача республикан беррига бахархой.

Кепайоазон цӀен пхе сага цу дийнахьа «ГӀалгӀай Республикан цӀихеза журналист» яха лакха цӀи елар.

ГӀалгӀай Республикан «Сердало» яхача ГАУ «Кепайоазон цӀен» кулгалхочун заместитель ва Ӏарчакханаькъан Сайт-Салам. Цо доккха дакъа юкъедахь гӀалгӀай мотт дегӀабоалабара, лорабара, ше каралаьца гӀулакх дика довзаш, кагирхошта дика хьехамча волаш, балха говзал йолаш, йоазонхо, поэт, дукха йоазош даь, наха цун карагӀдоалачун лакха мах оттабеш хьавоагӀа из, цу даькъ тӀа къахьегаш, укх массайтта шера.

«Сердало» кепайоазон цӀен кулгалхо Курскенаькъан Хадижат - цунна тӀалатт доккха балха дукъ а бехктокхам а, боахама доалахьардар, ахчанца дувзаденна хьал, иштта кхы а дукха гӀулакхаш кхоачашде дезаш хул из. Цул совгӀа, даим кхетаченашка дакъа лоацаш я. Из доацаш а, массахана нахаца болх бе безаш, «Кепайоазон цӀен» хӀара денна нийслуш дола хаттараш кхоачашде дезаш хул, цу юкъе да кӀира цкъа 16 оагӀув йола газет кийчдаь арадаккха дезаш хилар.

ЛаьрххӀа вола корреспондент ГӀазданаькъан Ахьмад массайолча оагӀорахьара начӀал долаш, очеркаш язъяра говзал ший санна кхы цхьаькхане йоацаш, ше яздеш дар наьха безам тӀабохийташ яздеш, таханарча вай турпалхошта хетабаь болх дукха беш, Россе халкъий барт бара тӀехьа дола дош хоза кхоллаш хьавоагӀа.

Дика журналист волаш вовзаш ва из, вай республике санна арахьа а. Ше каралаьца говзал лакха мах оттабеш хургйолча оагӀорахьа мара, къоалам Ӏохьокхаш а хиннавац укх дукхача шерашка.

Шеф-редактор вола Курскенаькъан ИбрахӀим тамашийна къахьегамхо ва, моллагӀча балха тӀа нийслуш йола халонаш, кӀаьд ца луш тӀехьаюташ, редакцен болх дикагӀа бара дукха низ тӀабохийташ, хьадеш дар цӀена а къаьга а хилийтара шийна ховш дар хӀара денна дегӀадоаладеш, хьавоагӀарех ва из. Цо ший тайпарча лакхача боарам тӀа даьккхар «Сердало» газет. Цу тӀа тахан дукха къахьег гӀалгӀай мотт дегӀабоалабара, из биццабалийтара тӀехьа.

Иштта ер статья язъеш волча сона а, Султиганаькъан Йоакъапа, елар лакха цӀи.

Из тхона а лоархӀаме да, хӀара денна беш бола болх белгалбар дика хеташ тӀаэц, болх кхы а бехктокхамегӀа бе догдоагӀа, хьамсарча республикан вахара хьайгара дакъа юкъехьош хиларо дега тоам бу.

СовгӀаташ деннача нахах дувцаш, ГӀалгӀай Республикан кулгалхочо Келаматанаькъан Махьмуд-Ӏаьлас аьлар, уж нах халкъа мах баь варгвоаца ганз я, эггара лоархӀамегӀа дола декхараш кхоачашдара йола кӀийле я из.

Кхы а цо тӀахьийхар СВО мугӀарашка латтача бӀухой, таро йоацарий дезал хьаллацара.

СовгӀаташ далар дувцача юкъе, цо тӀахьийхар паччахьалкхе, цун доакъош, къаьстта юрташка болх беш бараш, промышленни предприятешка къахьегараш теркама юкъеэцара.

Лоацца аьлча, наьха къахьегам ший ханнахьа белгалбар, тахан лоархӀамеча моттигашка дакъа лоацаш нах уж хилара мах оттабар нийсхо еш дола хӀама да, аьлар цо.

Цох кхувш йоагӀача тӀехьенна дика масал хургда. Нагахьа санна сага гуш хилча; комбайна тӀа вагӀар, гӀишлонхо, автобуса водитель, кхыйолча профессе викал Ӏаьдало теркалвелга; цо цигара масал чӀоагӀагӀа эцаргда.

ГӀалгӀайчен хӀара вахархочун дика болх - из тӀехьа тӀайоагӀача тӀехьенна еш йола йоакхо я.

Къаман Ӏадаташ, вахара дикаш, цун кхоллам из бахьан дахаш да.

Шеко йоацаш, тахан дӀахьалха йодаш я ГӀалгӀайче, ший экономика чӀоагӀъеш, социально лоархӀаме декхараш кхоачашдеш, дукха хӀама карагӀ а доалаш.