ТӀехьарча шерашка ГӀалгӀайче дукха ду республикера, Россе тайп-тайпарча моттигашкара, кхыча паччахьалкхенашкара  хьаухача хьаьший салоӀам дика хилийтара.

Мехка туристически оагӀув дегӀайоалаяра деш дар кӀезига дац. ХӀара кердча проекта чудоагӀаш хул, туристашца беш бола болх тоабар, могашал яйнача наьха хьалаш дикагӀа хилийтар, республике хьабоагӀача туристий терко дикагӀа тӀаозара дола хьалаш вӀашагӀдохкар. Из ший аргӀ-аргӀагӀа дегӀадоагӀаш латт.

Духхьала дӀадахача шера, ГӀалгӀайче 30 совгӀа проект кхоачашъяьй, туристаш лелаш йола моттигаш тоаеш, цу юкъейоагӀаш я исторе, культуран гӀишлош. Царех я Ӏабе-Гув, Фуртуога кхуркхолг, ЦӀай-Лоам, Бишт яха юрт, цига дукхача хана денз туристаш безамца хьажа ух. Уж моттигаш тоаяра, дика дегӀайоалаяра федеральни ганзера 30 миллион сом дӀахьожадаьд.

«ЛоархӀаме гӀа баьккхар «Ӏарамхи» яха туристий комплекс хьакхоллаш. ХӀанз цига хьаяьй 60 балха моттиг, хьалъяьй кхоъ гӀишло. Проект кхоачашъяра оттаяь ха чакхйоал 2029 шу йистедоалаш. Оаха лерхӀ цига, туристий теркам тӀагӀоргболаш, лерттӀа центр хилийта. Цул совгӀа, «ВЭБ.РФ» дегӀайоалаяра Паччахьалкхен корпораце, вай туризма Комитетаца цхьана, «Йоккха Кавказ» яха доазон тӀарча  мехкашта юкъерча  туризма лаьрхӀа  федеральни проект вӀашагӀъеллай.

Цо таро лургья, 2030 шерга кхаччалца, туристаш ГӀалгӀайче мел ухаргба ха, иштта из туризма оагӀув дика дегӀайоалае», - аьлар ГӀалгӀайчен кулгалхочо Келаматанаькъан Махьмуд-Ӏаьлас.

Мехка Ӏаьдал дика къахьегаш да, туризма даькъ тӀа инвестицеш юкъеяхара. Карарча шера пхе капитальни йоацача, модульни оалача гӀишлонна инвестицей проекташ кхоачашъяра ахча дӀахьожадаьд, цо таро хулийтаргья туристаш дукхагӀа тӀахьеха, царна лаьрхӀа дола хьалаш дикагӀа тоаде.

Иштта къахьегаш хиларо ший тайпара толамаш гойт. Карарча шера дӀабахача ялх бетта ГӀалгӀайче 61 220 турист венав, из дӀадахача шера вайцига хинначул 17 процент дукхагӀа туристаш баьхка хилар хьагойташ да. Гостиницашка фусамаш тӀакхеташ йоагӀа: ГӀалгӀайче хӀанз болх беш я 622 фусам (19,6 процент дукхагӀа я уж, 2021 шера хинначарел).

ГӀалгӀайчен Шолжа кхале керда туризма кхо никъ биллаб, хӀанз уж наькъаш да 34, цу юкъе 282 километр бӀаьха бола  цхьа къаман никъ а болаш.

ГӀалгӀайчено дика бувзам лелабу «Кавказ РФ» АОца, Ӏаьржа а Каспийски а фордаш хотташ хургбола Къаман Кавказа Никъ яха проект дегӀайоалаеш.

Цу проекта чудоагӀаш да вай лоаман мехкара   дукха хоза моттигаш, вай къаман карагӀдаьннар  гойтар.

ГӀалгӀайчен туристически таронаша терко тӀаоз тайп- тайпарча халкъашта, мехкашта юкъерча гойтамашка. Туристически даькъ тӀа республико гойт ший таронаш, иштта балха говзал екъ кхыча мехкашкарча туристий компанешца. Мехка туризма оператораша хьабаьхкача хьаьшашта гойт экологе туризм, автотуризм, курортни салоӀам, уж ерригаш а  кхыча гӀулакхашца цхьана дӀаяхьа йиш йолаш я.

Туризм лелаяра ший таронаш  хилар гойта йиш йолаш я ГӀалгӀайче, хӀанз из болх дикка дӀаболалуш боагӀа. Таронаш йовзара  инфотура даькъ тӀа вайцига Беларусь Республикан туроператораш баьхка хилар. Иштта Иранера туроператорашта йола программа кийчъеш я.

ГӀалгӀайчен туризма, денгара ди мел дала, дукхагӀа теркам тӀабодаш латт.

Мехка Ӏалама хозаленашка, культуран дагалоаттама моттигашка, карагӀдаьннача толамашка хьежача, еррига таронаш йолаш я туристически оагӀув шерра дӀабовзийтара. ДӀахо а туризм дегӀайоалаяро, цун хьалаш тоадаро кхы чӀоагӀагӀа из шеръергья.

Белгалдаккха дезаш да, мехка Ӏаьдало къаьнара культура, гӀалгӀай Ӏадаташ довзийтара дика къахьегаш хилар, цу дешо дукхагӀа тӀаоз туристий теркам. ГӀалгӀайчен мах бола тӀехьале - российски толамий тамашийна жовхьар да, цунна тӀалатт дерригача дунен безам.