«Цу тайпара юртбоахама хьал дегӀадоаладеш хилар лоархӀаме да вай мехка. Тхо лаьрхӀа да, ма хулла дукхагӀа вайцига моттигера сомаш, комараш лоаттае. ГӀалгӀайчен Паччахьалкхе кийча я из декхар кхоачашдара эшаш дола новкъостал лоаттаде», - аьлар Махьмуд-Ӏаьлас.

Беша 116 га ягӀа, дика хьувкъам луш. Укхаза МагӀалбика кхален бахархой ба ахкан хана 300 саг гаргга къахьегаш. Гуржий боалаш кхебарал совгӀа, дӀахойодача хана хьачаш, комсаш хургья укхаза.

ГӀалгӀайчен Кулгалхочо дийцар, ше вахача хана, боалий беша къахьегаш боахка кагирхой бӀаргабайча ше гӀадвахарах. Уж бар дешархой, колледжий студенташ.

«Уж баьхкабар, ахкан зама латтача юкъа, гуржий боалаш чуэцаш, шоашта пайда бе. Ара хаоттам бӀайха хиларга хьежжа доацаш, уж кадай а безаме а бар. КӀезига къамаьл дийцар аз царца, шоай цӀагӀа новкъостал хургдолаш, уж къахьегаш хиларах а дийцар оаха. Царех цхьабараша компьютер, телефон е кхыдола тӀадувха барзкъа эца мег шоай йишийна, вешийна, шоашта. Бакъда цох хьурмат дикагӀа дергда цар, шоай къахьегамца хьадаьккхача ахчах из ийца хиларах», - аьлар Махьмуд-Ӏаьлас.

Цо ловца баьккхар царна, массахана къахьегама тӀера болаш, лаьрхӀачунга кхоачаш, шоай гаргарча нахах дог лазаш хилба, аьнна.

Белгалдаккха безам ба, вай республике тайп-тайпарча лостамех юртбоахам дегӀабоагӀаш хилар. Мехка ГУПаша, иштта доалахьарча боахамаша тайп-тайпара культурай хьувкъам совбоаккхаш латт, наха эшаш дола даараш лоаттадеш.

Цунца цхьана боахамашка къахьегаш ба балхах дика кхеташ бола нах, йолаш я АПК дегӀайоалаяра технологеш а.

ГӀалгӀай мехка юртбоахам дегӀабоалабе дика таронаш я.