«Карарча хана цига дӀахьош латта болх боккха лерхӀам болаш ба вай къаман вахаре. Доазошта бустам боаккхаш, юххьанца денз гӀалай хинна куцаш дӀаяздеш, архивни каьхаташ, сурташ кердадоахаш, иштта кхыдола балхаш дӀахьош латт лоаман моттигашка.

ДӀадахача шера гуйран тӀехьарча бетта дӀаболабаь из болх, ер шу йистедаллалца дӀахьоргба. Цу юкъа де лерхӀар дукха да. Ма дарра аьлча, хьатӀаухача хьаьший хьал ма хулла паргӀатагӀа хургдолча тайпара тоаде гӀерташ къахьегаргда лоаме. Де лаьрхӀар хьаийцача, хинначул дикагӀа хургда цигара гӀулакх»,- дийцар «Сердало» газетага лоамарча музее.

«Доазув» яха оагӀув юкъебаккхарца, лоаме баьхкача нахаца цхьа цӀаьхха хатар хилча, оарц деха, царна гӀо де аттагӀа, паргӀатагӀа хургдола наькъаш хьаделларгда. Цу гӀулакхо дог тийша, кхерам боацаш, сапаргӀата ха яккха аьттув лургба лоамашка леларашта.

ЦаӀ йолча хоамий базанна юкъедолхараш довзаргда гӀалай вахар довза ухарашта, укх шера бӀаьсти. Шоашта беза никъ, моттигаш хьалххе хьалаха аьттув хургба хьаьший, цул совгӀа, лоаме бахкар хьалххе вӀашагӀдолла йиш хургья цар. Ӏалама доазонашка керда яьнна технологеш эггара хьалха йоаржаяьрех ба вай мохк. Цу гӀулакхо хьахьокх, Ӏалама моттигаш лораяра тӀехьа, туристаш тӀаозар духьа вай мехка дикка къахьегилга.

Белгалде деза, «Доазув» яхар маьха лакха доацаш гӀулакх хилар, вай моттигашка дика чакхдаккха йиш йолаш долга. Вай мехка санна кхыйолча моттигашка а, пайда эца йиш я цох.