«Тахан дег чу латт, лира тIом бахьаш тIалета моастагIа, ший низах вохавеш лаьттача, вай къаман сийдолча къонгий цIераш.

Эпсарашеи хьовдашеи (командираш) тамаш еш, майрал хьекхай боккхача тIем тIа вай денал долча бIухоша, — аьлар тха газета интервью луш Россе турпал волча Къоастой Абубакара. — Архиверча каьхаташка хьожаш баьча тохкамах, тIем тIа вай дукха бIухой хиннаб».

Цар тамаш яйтай кхыча къамий нахага, валарах кхерабенна юхацабаларах. «Дики дивизен» юкъе болаш цар гойтача майралах дуккхача моттигашка яздаьд. Георгиевски кавалераш болаш, лакха тIема орденаш телаш, чакхбаьннаб вай бIухой.

Исторе тахан дувц, Брестски крепосте чугIийртача фашисташта духхьал, вай къаман наха яьча духьаленах. Партизански отрядашта юкъе болаш, моастагIчун наькъаш тедаш, говза схемаш оттаяь карташ штабе чубувлаш дIакхухьаш, бийсанна, хьуна юкъе гIолла текхаш тIаухаш, моастагIчоа ца меттача хана из вохавеш лаьттаб вай бIухой.

Эггара лирагIа тIемаш лаьттача моттигашка дакъа лоацаш хиннаб гIалгIай майра къонгаш. Уж я — МагIалбик, Москва, Ленинград, Курск, Сталинград, Керч, иштта, кхыяраш а. «Кавказера аьрзи», «Кавказо кхедаь лом» яха цIераш офицераша йоахаш белгалбаьннаб уж.

Къам мехках даьккхача а, шоай цIераш хувцаш, дIахьо тIом беш коталон ди гарга доаладе гIерташ, дIабахаб. Эггара халагIа йолча операцешта юкъе хиннаб вай бIухой, дукха немций эпсараш есарал кхийлаб. Иштта майрал гойташ чакхбаьннаб вай кагирхой Афганистане.

Цига лаьттача тIема юкъе вахар хаьдад: Овшанаькъан Саламхана, Бачаланаькъан Юнуса, Балкхой Хьасана, Йовлой Башира, Итазанаькъан Iисай, Льянанаькъан Мусай, Мухлисов Юсапа, Малсаганаькъан Рамзана, Оздой Iумара, Элданаькъан Мусай.

Тахан вай массане декхар да, царех хIаране цIи еза йолаш дег чу лелаяр. Уж берригаш вайна е таханара маьрша вахар даккха гIерташ лаьттаб. Мехкдаь цIерах, МагIалбика бахархой, Даьхе лораеш латтарий денца даькъала бийцар, Правительства кулгалдеш волча, Сластенин Владимира.

Исторе ховш да, гIалгIай зIамига къам, тIема юкъе лоархIаме дакъа лоацаш лаьтталга.

Паччахьа ханашка а виъ генерали, 36 Георгиевски кавалераши хиннаб вай. ТIема майрал, цар дегашка, дукхача хана денза кхеяь лаьттай. Ха мел йода керда турпалхой, сийдола къонгаш дунен бIаргабайташ хьаденад гIалгIай къам. Таханарча дийнахьа а эскаре декхараш кхоачашдечарна юкъе ба дуккха, денал дола, Даьхен накъабаргбола къонгаш.

Кхычарна хьалхашка доккха масал долаш, шоаш хьабаьннача моттига, сий Iо ца дожийташ декхараш дIахьош ба кагирхой. Кадетски корпусе, эггара лакхагIа лерхIам болча оамалашца, кхебеш латт зIамагIабараш. Цу вIашагIкхетаре, «Юнармейская доблесть» яха знакаш ялар юнармейцашта Сластенин Владимиреи, пхье администрацен кулгалхо волча Галай Мусаси.

Къаман вахаре цар дIабихьача белха лакха мах оттабеш белгалбир — Ахтоланаькъан Амина, БIархой Ахьмад, Крючкова Полина, ГIаьнажанаькъан Хаматхан, Гезганаькъан Амин, Дзовранаькъан Диана, Йовлой Раяна, Йовлой Самир, Измайланаькъан Абу-Саид, Исмейланаькъан ИсмаIал, Коазой Амина, Хасбулатов Мансур, Хучанаькъан Муслим, Чермов Адам.
Яхийла къаман вахаре, массе хана, сийдолча наьха цIераш! Халача вахарах лорайойла Дала, вай хьамсара Даьхе!