Керда аллеяш, сквераш, гIашлой наькъаш, лампаш, наха салоIаш Iохайша ха яккха лаьрххIа тоаяь моттигаш бIаргаяйча, дийца варгвоацаш, йоккха гIозал йосс дег чу. 2025-ча шера тоае езача моттигий къоастам беш, хоржамаш дIахьоргда кастта бахархошца. Шахьара куц тоадара тIехьа кхеллача федеральни программага гIолла дIахьош йола шахьаре беркате хувцамаш юкъедоаладеш йола яхьаш 2030-ча шерга кхаччалца дIаяхьа соцам баьб РФ Президента Путин Владимира. Мекъал юстаръяьккха, цу тайпарча беркатеча гIулакха юкъе дакъа лоацаш хила деза вай дерригаш, хIана аьлча вайна хьакхоллаш хIама ма дий из! Таханара хоржамаш - вай Даьхен кхоанара куц! Кхоачашъяьча проекташка хьажа эттача, уж тахан гIадвугаш.

Шахьара урамашка гIолла лелаш, тахан вай зув, цхьан хана теркал ца еш, яьда моттигаш тахан, Iохайна, цIенача феца садоахаш вагIа, салаIа оттадаь гIандаш долаш, бера ловза доазош къоастадаь, лакха, хоза лампаш егIа тоаяьлга. ЮхегIолла тIехваьнна дIаваха ца могаш, цу хозалца ший дог хьаста ловш Iохов саг, уйла ю, цхьан хана йоархIех йикъа лаьтта моттиг я-кх ер аьле… Боккха лерхIам болаш болх ба цу мугIаре тахан вай мехка дIахьош латтар. Наьха уйла, нигат, лерхIамаш хийцад цу гIулакхо. Селхан цIагIа чубаьхка нах, тахан цу хозача моттигашца дог ловзаш, шоай берригача дезалца хьа а баьхке, ха яххалца салоIаш хул цига. Дийца ца валлал йоккха гIозал я уж моттигаш къаьстта берашта.

ХIара денна хулаш дола иштта беркате хувцамаш зувш болча кагирхой а безам хул тайп-тайпара керда, мехка эшаш йола проекташ кхолла. ЧIоагIа лоархIаме да иштта болх дIахьош бахархоштеи хьакимаштеи юкъе бувзам хилар. ВIаший бувзам болаш дIахьош бола моллагIа болх, дуккха беркатегIа хул тIехьагIа. Шийна тIехьа хоза лар йитар, эггара доккхагIа долча дикаех да! Мехкахошта, Даьхенна даь дикаш лар хадаш хилац, уж дах шергара шу мел доал чIоагIагIа лерхIам беш, доаккхал деш. Эздийча сага оамал я, шийна тIехьа наха пайдане хургдар дитар! Вай республикерча шахьарашка кIезига яц бахархошта езаеннарех йола, хьаьший бIарг тIаотташ йола моттигаш. Кхы а тоалуш, эргадоаккхаш дIахьоргда из гIулакх дIахо. ХIара керда моттиг хьайийллача, вай теркалду, из хьалйизза боккхийбараш, кагирхой, бераш цига ха дIаяхьа гуллуш хилар.

Духхьал гIандаши, лампаши, бордюраши, кIалха теха плиткаши яц вай ювцараш, хIара денна тоалуш, шерлуш, бахархой, хьатIаухача хьаьший безам тIаозаш латта мохк ба вай бувцар… Цу моттигаша хьагойт-кх вай оамал, Iадат, лерхIамаш, уйлаш. Ший Даьхен моттигаш тоаяра тIехьа дакъа лоацаш хилар, цхьацца керда проекташ вIашагIйохкар – боккха, лоархIаме болх ба. ВIалла хало а йоацаш, из дика хIама хьаллаца йиш йолаш ва-кх вайх моллагIвар. Масала, ше вахача шахьаре массехк керда га дIайогIар, къахьегама шоаттанна юкъе дакъа лацар, ше вахача доазон моттигашка бIарг локхаш, уж лораеш хилар вайх моллагIчунна дIатокхалургдола декхар да. ТIаккха майрра ала йиш я вай, цхьа илли дагалаьца, «шахьар сагаца бувзам болаш я», аьнна. Вай дешаш, болх беш, дахаш, салоIаш йола моттиг дIатIахьежача, вайна из езилга, цун хам белга, доаккхал делга хоалуш хила еза!