Росси къаман проекташ
Кхаь юртарча бахархошта лаьрхӀа, дарбанче хьайийллай республике
Кхаь юрта бахаш болча наха лаьрхӀа, дарбанче хьайийллар вай мехка. 222 млн сом ахча дахад из хьалъярга. Дарбанче хьаеллача дакъа лоацаш вар вай Мехкада Келаматанаькъан Махьмуд-Ӏаьла. «УнахцӀено» яхача къаман проектага гӀолла, ГӀалгӀай республикера унахцӀенон хьал тоадара тӀехьа йолча федеральни проектага гӀолла дӀабихьар из беркате болх. Мехкара унахцӀенон гӀулакх меттадоаладара тӀехьа; баьккха боккха, лоархӀаме гӀа ба из. Из хоам «Сердало» газетага бир Мехкадаь зарбан болхлоша. Дарбанче хьаелларца, даькъалабийцар Мехкадас цу чу къахьега дезаш бола болхлой.
Белгалдир, унахцӀенон хьал тоадара тӀехьа кхеллача проекташа вай региона мах баь варгвоацаш доккха гӀо даьлга. ЛаьрххӀа доккха баркал аьлар Мехкадас, из дарбанче хьалъеш гӀо деш мел хиннарашта. Республикан кулгалхочо дийцар, унахцӀенон хьал тоадар эггара лоархӀамечарех цаӀ долга, къаьстта чӀоагӀа хьаллаца деза из гӀулакх мехкарча юрташка. Кердача дарбанчеша аттачахьа боаккх лорий болх, боаггӀача боараме дӀакхоачаргья наха еш йола терко. Дарбанчен моттигашка хьожаш чакхваьлар Мехкада, лорашца къамаьл деш техкар, малагӀа молхаш я эггара чӀоагӀагӀа эшараш. Берий лорашца дийцар Мехкадас, таханарча хана берий унахцӀено лораяр эггара керттерчарех долга.
«Дега чӀоагӀа тоам хилар, кердача кабинеташка дӀачууха лораш, лорий йижарий гӀадбаха болаш гуш. Из дарбанче хьаеллар чӀоагӀа доккха дика да вай мехка, къаьстта ТӀой-Юртарча наха. Лораш, цигара бахархой даькъалабувц аз цу хозача гӀулакхаца. Федеральни оагӀонгара кхаьча доккха совгӀат да из вайна», - белгалдир Мехкадас.
Хьайийллача дарбанчено гӀо дергда амбулаторно-поликлинически оагӀорахьа, иштта унахошта дарба деш бада моттигаш я цига. Терапевтически унахошта лаьрхӀа - 30 моттиг, дега лазараш долчарна лаьрхӀа - 5 моттиг, вешта аьлча, 100 совгӀа унахо тӀаэца йиш йолаш ба уж дийнахьа. Цу дарбанченна чуйоагӀа ТӀой-Юртара лорий амбулатори, фельдшерско-акушерски пункт, Долакха-Юртарча бахархошта лаьрхӀа лорий амбулатори, Долакха-Юртара фельдшерско-акушерски амбулатори, ГӀайрбика-Юртара фельдшерско-акушерски пункт.
Иштта дарбанче я маьхий детташ йола кабинеташ, вакцинацена лаьрхӀараш, берий, боккхийчар царгаш тоаеш йола моттигаш, ток увттаеш, узи йоаккхаш, кизга увттадеш йола кабинеташ, лаборатори. «Земски лор» яхача паччахьалкхен программага гӀолла дӀабихьача балхо 100% тоадир, массайолча дарбанчешка эшаш мел бола лораш хулийташ дола гӀулакх. Тахан ТӀой-Юртарча дарбанче йолаш я унахой лазараш тохкаш, гучадоахаш эшаш мел бола гӀирс: ФЦМ- Барс яха кизга увттаду аппарат, узи йоккхараш, царгий лорашта эшараш, дего болх мишта бу тахка ховраш, иштта кхыяраш а.
