ГӀалгӀайчен столице Магасе дӀайихьар «ГӀалгӀайчен Бизнес-акселератор» таьрахьа дегӀаахара Академе даькъ тӀа хьаеллаш йола кхетаче, яхаш, дийцар «Сердало» газетага.

«Цун доакъашхой хилар Келаматанаькъан Махьмуд-Ӏаьла, цӀихеза предприниматель, меценат, «САФМАР» ганза кулгалхо Гуцаранаькъан Микаил, таьрахьий дегӀаахара Академе кулгалхо Арцюх Дмитрий Владимирович, «ФРИИ Акселератора» кулгалхо, ФРИИ керда проекташ хьаллоацача ганза доакъашхо Калаев Дмитрий Владимирович, кхыбола беза хьаьший, студенташ, шоай хӀама дӀадоладу къонабараш»,- аьлар хоамо.

«ГӀалгӀайченна, цун кагирхошта, вайна массанена из лоархӀаме да. Цо ӀТ-компани дегӀайоалаяра, иштта шоай болх дӀаболабеш болча хӀама хьадеча наха дика таронаш лу экономика дегӀайоалаяра.

Из дика таро я бизнес-уйлан чоалханера хьалаш довза, хӀама дӀадоладеш хьалхара капитал эца, цул совгӀа, хилча бакъахьа дар хьалхадоаккхаш, лакха говзал йолча эксперташа луча говзанч-хьехамашка мах боацаш Ӏомавала»,-аьлар Келаматанаькъан Махьмуд-Ӏаьлас.

ГӀалгӀайченна йоккхий таронаш хьаелл, технически хьалаш юкъе а доахаш, вахара-экономически дегӀаахара даькъ тӀа.

Цу балхах лаьца дувцаш, Россе Президента В.В. Путина цкъа аьлар: «Таханарча заман хьалашка хьабеча балха толамаш дувзаденна да таьрахьашка даккхарца, сага кхеллача интеллекта технологеш лелаярца.

2030 шерга кхоачаш, вай массадолча вахара, экономикан даькъош тӀа таьрахьий майдаш хила еза».

Цу лоархӀамеча декхара цхьа дакъа, хьалха Махьмуд-Ӏаьлас белгал ма дарра, тахан ГӀалгӀайчен мехка кхоачашдеш латт.

Эксперташа яхачох, деша багӀача юкъа, ГӀалгӀайчен Бизнес-акселераторош Ӏомабеча хӀаране шийна ховш дар лакхдергда, дикагӀа кхеташ хургва таханарча хьалашка мах бара даькъ тӀа дӀабахьа безача балхах.

Кагирхошта ловца боаккхаш, ГӀалгӀайчен Кулгалхочо аьлар, ше юкъе волча тоабаца цхьана дика къахьегаш хилар, гӀалаташ малагӀаш да хар, ше дӀахьош долча гӀулакха дикагӀа йола моттигаш йовзаш хилар лоархӀаме да, аьнна.

Махьмуд-Ӏаьлас баркал аьлар мехка иштта чӀоагӀа эшаш йола дешара проект кхоачашъярах Гуцаранаькъан Микаила, интернет дегӀайоалаяра ганза, из лоархӀаме кхетаче вӀашагӀъелларашта.

Цо иштта ловца баьккхар, из гӀулакх хьалхара дӀадоладеш болчарна, профессен наькъ тӀа уж даим дегӀаахар, хьалхашка оттадаь декхар кхоачашде таро цар хилар ловш.

Белгалдаккха лов, Гуцаранаькъан Микаила дукхача наха баркал аьлар ший мохк безаш, цунна шийгара новкъостал де хьожаш из хиларах.

Саварбика Микаила иштта гулбеннарий теркам тӀабахийтар акселератора балха кертте латтачунна. Сиха дегӀадоагӀаш, экономике дукхагӀа эшаш а пайдане а хургдар лохаш, программироване балхах дика кхеташ, маьха еза йоаца продукт лахара начӀал долаш; из, цунах пайда а беш, маьхал яккха ховш; ше дийшачох мехкал арахьа а, дерригача дунен тӀа а пайда эцаш хилар.

Презентаци йолаш, цо белгалдир, ГӀалгӀай мехка толамаш доахача йоккхача инвестицеша, къахьегама тӀера болча кагирхоша, диъ-пхи шу кхы даьлча, шоай белггалара пайда гойтаргба.

Карарча хана, «САФМАР» цхьатарра болх беш я, республикан лоархӀаме декхараш кхоачашдеш. Уж балхаш да ГӀалгӀайчен цӀихеза гӀалаш меттаоттаяр, иштта гӀалгӀай мотт дегӀабоалабара деш дола новкъостал, балха моттигаш хьакхоллаш хилар, кхыдола лоархӀаме гӀулакхаш кхоачашдеш хилар.

Цу кхетачера баьлча, хиннача пресс-къамаьле цар дийцар акселератора программан кертерчох, республике из лоархӀаме хиларах, ГӀалгӀайче ИТ-доалахье лелаяр дегӀадоаладара лоархӀамах.

Хоза хийтар доакъашхошта Бизнес-акселератора балха моттигашка хьожаш, цу даькъ тӀа гӀолла экскурси еш.

Цхьа ха яьнначул тӀехьагӀа, из моттиг хьамсара а боча а хургья кагирхой кердача тоабашта, цига деша ловрашта.

Кхетаче дӀахьош тха къамаьл хилар инвестицей программаш кхоачашъяра даькъ тӀарча говзанчашца. Уж тешаш ба, тахан цига деша багӀача вай кагирхой дика таронаш хиларах.

Дукха хӀама тийша да кхыметтел цхьан сагах а, ший дешарах из кхеташ хиларах, юкъедуташ дола кхоачамбоацараш хьалаха а, уж юстардаха а цун ховш хиларах, ший профессиональни оагӀув цо дегӀайоалаеш хиларах.

Вай республике, карарча хана, хургдолчунна дика оагӀув дегӀайоалаяра никъ хьабийллаб, экономике цо белггала дакъа дӀалоац, дика моттиг хьалацара йола таронаш я хӀанз хьакхоллараш. Массане а шоашта могар де деза пхе шера, таьрахьа массайола оагӀонаш пайдане хилийтара, тӀехьа тӀадоагӀача итташ шерашка а дика тӀехьале цох хургйолаш.