Вайцига дац доккхий хиш, цудухьа долчар экологически хьал тоадар массанега кхоачаш да. Укхаза хий лораде, цун кхом бе беза. Хиш цӀендеш дола гӀирсаш массайолча моттигашка латта деза: болх беча моттигашка, цӀагӀа. Боарам боацаш дукха хий доаду вай хӀара денна, тӀаккха уж деррига бӀехденна хиш лаьтто чудуъ.

Из оагӀув вай лорабеш ца хилча, массехк шу даьлча вайна гонахьара Ӏалам малагӀча ден тӀа кхоачаргда ха хала дац…Экологе хьал лохлуш дола доккха во хургда цох. Уж хӀамаш теркалдеш воацача сагах кхета хала да.

Ше садоахаш дола фо, кхача тӀабоалаш дола лаьтта, гонахьара Ӏалам малагӀча хьале оттаргда кхетаде безам боацар ираз дайнарех ва. Вай мел леладер довргда, мах боацаш хургда из оагӀув телхача.

Хий цӀена, дегӀа зе доацаш ца хуле, лаьтташ дӀадувш, Ӏан кийчо еш, беркатеча кхоаненга сатувсаш вай мел кхестадер пайдана хургдац. Хий цӀендеш дола гӀирсаш кастта массанахьа латтаргда. Вайх хӀаране вахаре дукха я химически хӀамаш, хиш бӀехдеш вай лаьтто чуюъ уж.

Керда даьннача гӀирсаша царех, иштта кхыдолча зе деча хӀамаех цӀендергда хиш. Экономикан хьал а дикка тоадар хургда цох. Массайолча моттигашка хин счётчикаш увттайича, боарам боацаш хий доадераш а кӀеззига юхабаргба. Ше доадеча хӀаман хам ховш хила веза саг, из ца хилча шийга фу хьал хургда кхетаде деза.

Цу оагӀонцарча говзанчаша теркалдечох, СКФО моттигашка массахана эшаш хургда уж гӀирсаш. Цу проекташка вай, берий, даьй, ноаной, къоаной унахцӀено я. Вай теркалдеш да-кх, цӀена доаца хий мелача сага могашал ханал хьалха талха йолалулга.

Дошо гӀала а йолаш, эггара езагӀа йола машен Ӏа хехке а, молаш дола хий цӀена деце, унахцӀено сиха вӀашкагӀоргья хьа. Адамашта массахана хьалхадаха деза, хий лорадар лоархӀаме долга, цун хам беш ваха везилга.

ХӀара сага из хӀама ший хьаькъале дӀачӀоагӀдаь, хьаллоацаш хуле, тӀаккха меттада мег вай хьал. Экологе, Дала хьаденнача гонахьарча хозача Ӏалама хьал да вай дувцар. Уйла е хӀама да из вайх хӀаранена!