Дохаде ца мега къам
ГӀалгӀайчен эзараш болча наха дагалаьцар, къам мехкахдаьккха ха
ГӀалгӀайчен Наьсаре, къам мехкахдаьккха хилара дагалоаттама мемориала гIишлош йолча митинг йир, из хетаяь яр мехкахбахара халонаш: валар, доацар тӀакхоллар, шелал, моцал, къизал, нийсхо цахилар - лайнарашта, яхаш дийцар «Сердало» газета корреспондента нах вӀашагӀкхийттача моттигера.
«Цу лоархӀамеча митинге дакъа лаца венавар ГӀалгӀайчен Кулгалхо Келаматанаькъан Махьмуд-Ӏаьла, мехка тайп-тайпарча юкъарча моттигий болхлой, кагирхой, къоаной, республикан шахьарий, юртий бахархой. Нах баьхкабар цу унзарча шерашка Ӏазапа духьалъэтта, уж халонаш ла йийза вай къоаной дагалаца, цар сий де. Уж иштта царна маьл кхайкабе, уж Даьлагара беха, цӀаккха шоай мехка баргбоацаш цига бисараш дагабоха баьхкабар», - йоах хоамо.
«ГӀалгӀай, нохчий, балкхарой, къарший, гӀалмакхаш, кхыдола къамаш мехкахдахарах доккха Ӏазап тIаэттар цу къамашта. Вай тахан, кхоана, массехк шу кхы даьлча уж дагабоагӀаш хила деза... Цул совгӀа, воашта могар де деза, кхы тӀехьагӀа цу тайпара къизал боккхийча наха, кхалнаха, берашта гургйоацаш.
Деррига къам мехкахдаккхарах, вайгара дӀадаха маганзар вай Ӏадаташ, культура, мотт, къаман са», - аьлар, ше къамаьл деш, ГӀалгӀайчен Кулгалхочо Келаматанаькъан Махьмуд-Ӏаьлас.
Цо белгалдир, цу хана вай боккхагӀчар шоай хьаькъалца, деналца лорадир къаман мах бола хIамаш, халонаш нийсъеннаяр аьнна доацаш, духьалъэттар уж, цунца масал а гойтар тӀехьа тӀабоагӀарашта, цудухьа ца дохаш кӀалхардаьлар къам.
ДӀахо Махьмуд-Ӏаьлас дийцар, гӀалгӀай къам мехкахдаьккха Ӏодохьийтача хана, беррига мохк дездеш бар Даьхен лорбой ди. Бакъда цу политически харцоно кегаданзар вай къам», - аьлар Келаматанаькъан Махьмуд-Ӏаьлас.
«Массайолча хана а лоархӀаргба вай Даьхен лорбой, бизза бола къонахий-бӀухой, шоай лоӀаме тӀема мугӀарашка эттараш, салтий, эпсараш, Сийлахь-боккхача Даьймехка тӀом латтача хана моастагӀчоа духьаллаьттараш, тахан а Россе кхерамзле лораеш турпалхой болаш хьабоагӀараш. ГӀалгӀайчен бӀухоша деналца, турпалца дӀахохьош да тахан къаман боккхагӀчар дита гӀулакх, лаьрххӀа йола операци дӀахьоча», - аьлар цо, мехкара а моттигера а таханара ха ювцаш.
БӀаьш нах бар митинге ламазаш деш, дуӀаш деш, маьждигашка, наьха фусамашка, паччахьалкхен урхалленашка, цига байна нах Даьлагара бехаш, царна сагӀаш доахаш. Беррига а доакъашхой цхьа уйла йолаш бар, вай республика йохаргйоацача Россен халкъий дезалах цаӀ я, ший вахара-экономически дегӀаяра болх дӀахо а хьоргба. Из да, хиннар диц а ца деш, вай хьамсарча мехка а ерригача Россе а хургдолчун тӀа къахьегара вай кийча хилар.
