Кино кхоллара хетадаь цӀай
«Дошо гӀала» яха дерригача къамашта юкъера кинофестиваль дӀайихьар вай республике
Шолжа-Шахьарерча культуран цӀагӀа хилар кинокхетаче дӀакъовлар. ЦӀай дӀадахьа хержараш бар Россе театра, кино актриса йола Лачина Ирина, актёр, режиссёр, продюссер вола Сальников Егор. Кинофестиваль йолча массехк дийнахьа, доттагӀал тессар царца вай хьажархоша.
«Вайцига «Дошо гӀала» яха кинофестиваль дӀакхухьа ийс шу да. Цу юкъа массанена езаеннай из. Вай боккхача мехкарча ерригача моттигашкара кинематографисташ шоай цӀи дӀайовзийта йиш йолаш ба цига. Кино кхоллара гӀулакх моллагӀча сага низ дӀакхоачаш дац. Цо йовзийт культура, чӀоагӀбу къамашта юкъера бувзам. 14 мехкара нах бар, укх шера фестивале дакъа лоацаш. Хьалхара шоай балхаш гойташ бар Инди, Малайзи, Бразили, ХӀирийче яха мехкаш. Къилбаседа Кавказера мехкаш а дар цига дакъа лоацаш. «ДикагӀдола гӀалгӀай кино» яхача номинаце коталонга кхача гӀерташ дар гӀалгӀай режиссёрий кхо фильм», – дийцар тхога культуран гӀулакхех йолча министерствон кулгалхочун декхараш кхоачашдеча Малсаганаькъан Хьажбикара.
Республикерча бахархой, хьатӀабаьхкача хьаьший аьттув бар цу фестивале тайп-тайпара кинош довза. Массане из аьттув хилийта хьежабар болхлой хьалххе а. Республикерча тайп-тайпарча 15 моттиг къоастаяьяр цу гӀулакха лаьрхӀа. Кинотеатрашка, культуран цӀеношка гойтар кино.
Кино кхоллача даькъе дукха хана денз белгалбаьнна, лакха начӀал дола нах бар республике гулбеннараш. Царна юкъе бар Россе халкъа артист, фестивала исбахьален кулгалхо Лаврентьев Клим, ВГИКа профессор, режиссёр, продюссер, актёр вола Фокин Владимир, Белоруссерча кинематографистий Союза кулгалду Васильев Виктор, театра, кинон актёр вола Назаров Юрий, Россе цӀихеза артистка, гӀалгӀай халкъа артистка йола Янданаькъан Тамара, Молдован халкъа артистка, актриса йола Тома Светлана, Москверча театра цӀихеза актриса Нечитайло Полина. ВӀаший бувзам чӀоагӀбеш, шоайла бовзаш, хоза дӀадахар уж денош. ЦӀаккха а йицлургьяц из фестиваль, хьалхара моттигаш яьхарашта. Гран-при кхаьчар Лебедев Николай яхача режиссёра оттадаьча «Нюрнберг» яхача кинофильманна. Вай Мехкадас деннача совгӀатаца а белгалдир из кинолента.
«Эггара дикагӀа дола документальни кино» яха совгӀат «Бера лаьрхӀа миллионаш» яхача, Бохтаранаькъан Ильяса оттадаьча кинон кхаьчар. «ДикагӀдола ловзара кино» яха совгӀат Борисова Любас оттадаьча фильманна кхаьчар. Къаман Ӏадаташ, оамалаш, культура лораяра тӀехьа кхеллача, «Юрто техкар» яхача Черсий мехкарча режиссёра Сатыров Ислама балхá делар фестивала вӀашагӀъеллараша лаьрххӀа оттадаь дола совгӀат. «ДикагӀа дола гӀалгӀай кино» яха совгӀат режиссёр йолча Къоастой Мадинас оттадаьча «Даха илли! Даха!» яхача кинонна кхаьчар. «Са цӀа - са дезал» (режиссёр Алиев Элвик, селий мохк), «Хьаделла хьай дог» (режиссёр Яновская Ирина, хӀирий мохк), «Селий мехкара Амати» (режиссёр Сулейманов Мухьмад, селий мохк) яха документальни кинош оттадаьрашта дипломаш делар. Иштта дипломашца белгалдир «Нийсо» яха Таджикистанерча Авазов Дишлода оттадаь исбахьален кино, «Кхыча тайпара сигале» яха Лисицина Ольгас оттадаь исбахьален фильм. «ДикагӀа йола маӀача наьха роль» яха совгӀат кхаьчар «Лор» яхача картинанна керттера роль ловзаяьча Пускепалис Сергейна. «ДикагӀа йола кхалнаьха роль» яха совгӀат делар «Шодамаш» яхача исбахьален фильман керттера роль ловзаяьча Мамрешева Светланайна.
Кинофестиваль дӀакъовлаш, доккха баркал аьлар гулбеннараша хьаьший хоза лархӀа ховш долча вай къаманна. ДӀа-хьа къаста ловш бацар хьаьший. Кхы а дукха керда кхетаченаш хьеж царга! ТӀадоагӀача шера иттлагӀа къамашта юкъера «Дошо гӀала» яха фестиваль дӀахьоргья вай мехка.
