«Гӏалгӏай Республикан профсоюзий цхьанкхетаро», Союза кулгалхочо Оздой Мухьмада Хаде кулгал деш, доакъашхоша  чаккхе йир маьтсела бетта 1-ча денна хетаяь дӏайихьача кхетаченашта, иштта  цар дийцар хьатӏайоагӏача отчетно-хоржамий конференци дӏаяхьара   кийчо ярца дувзаденна дешаш, цар дӏахо хержар профсоюза кагирхой даькъ тӏа болх дӏахьоргбола керда кулгалхо.

Кхетаче дӏахьош дакъа лоацаш хилар Гӏалгӏай Республикан Кулгалхочун Администраце, Паччахьалкхен викалаш, цо белгалдир мехка вахара-политически оагӏув, профсоюзий болх лоархӏаме болга,  къахьегамхой бокъонаш лораяра, кагирхой политика кхоачашъяра ӏаьдала профсоюзашта юкъера къамаьл эшаш долга.

Керттера дар цига Гӏалгӏай Республикан профсоюзий Кагирхой кхела кулгалхо харжар. Из бехктокхаме моттиг дӏалаьцар Цӏолой Мухьмада Ислама.

Гулбеннараша белгалдир, Ислама кагирхой политика дегӏайоалаяра, берий бокъонаш лораяра йолча юкъарлон вахаре лоархӏаме болх лелабаь хилар. Хьалхагӏа из вар «Цаӏ йолча Россе Къонача гварде» моттигерча даькъе  болх беш, цига цо кхоачашбора зарбан болх, иштта кагирхой хьашташка хьожар. Цо  болх баьб Федеральни берий  юкъарлон кхеле, РФ Президента бокъо енна берий Викал волаш, цо кулгал даьд Гӏалгӏайчен моттигерча берий юкъарлон кхела.

Цӏолой Ислам ва Къилбаседа Кавказе  «Россе театра кӏийле» яха  кхувш боагӏарий театра студе  фестиваль хьалхара дӏайихьар. Из лаьрхӏа яр кагирхой кхоллама таронаш йоаржаяра. Цо тайп-тайпарча кхетаченашка, конференцешка, дешара программашка дакъа лаьцад, цо тешал ду кагирхой политикан, кхетаченаш вӏашагӏйохкара болх цунна дика ховш хилара.

Кхетаче дакъа лоацаш хиннараша тешал дир; Цӏолой Ислама кулгал а деш, къонача говзанчашца, студенташца болх дӏахьош хуле; лакха толам гойтаргба дӏахо дӏайодача хана; цу балха даькъ тӏа, аьнна.

Гӏалгӏайче кийчлуш я «Россе къона профсоюза кулгалхо» яха яхь дӏаяхьа.

Кхетачене иштта чӏоагӏдир «Россе къона профсоюза кулгалхо» яха ерригроссийски яхь дӏахьош йола ди. Цу кхетачено тӏахьех хьинар дола, кхоане йола къона профсоюза кулгалхой, берригача мехка гӏолла белгалбара, уж хьаллацара.

«Россе къона профсоюза кулгалхо» яхача яхьа  моттигера дакъа дӏахьоргда маьцхали бетта 18-ча дийнахьа. Из болх вӏашагӏболлаш йола комитет укх деношка дӏайолалургья доакъашхой, кхелахой белгалбе. Къахьегамхой хьашташ довзаш, начӏал дола, вай республикан профсоюза болам дегӏабоалабеш хургбола кулгалхой харжара лаьрхӏа да из. Гӏалгӏайчен профсоюзаша хьаллоацаргба «Къахьегам, цхьоагӏо йолаш» яха ерригроссийски болам.

Россе Ди долаш, кхетачено  лаьрхӏар   #СаКъахьегамХьонаРосси яхача белгалонах дӏахьош болча, мехка Профсоюзий Кагирхой кхела Федераце ерригроссийски боламе дакъа лаца. Цун цӏи я «Къахьегама цхьоагӏо», Гӏалгӏай Республикан профсоюзаша из дӏаяхьара декхар  лаьрххӏа тӏаийцар, цига  къахьегама тоабаш йийхар дакъа лаца.

Болам дӏахьош хилара керттера бахьан дар  дийнача исторега, сурташка гӏолла  дӏагойтар, къахьегама ноахалий        бувзамаш тайп-тайпарча боахамашка хилар, мохк дегӏабоалабеш цига хӏаране шийгара дакъа юкъедена хилар; Росси хьакхоллаш къахьийгарашта, хӏанз а къахьегаш дӏахоболхарашта баркал алар.

Из болх дӏабахьара, хӏанзарча ханашкардар вӏашагӏтоха деза. Цу гӏулакха эшаргда оаш болх беча даькъош тӏара къахьегама ветераний архивашкара сурташ, шийгара укх заман сурт тӏадилла деза, ерригача коллективаца даьккха сурт хила деза, уж каьхаташ кийчде деза, ФНПР Кагирхой кхела лаьрххӏа дола йоазув юкъедоаккхаш. Цул совгӏа, хӏара йоазув ветерана карагӏдаьннар дувцаш хила деза, иштта таханарча къахьегама ӏадат а цу тӏа дийцача нийса хургда.

Республикан ерригача профсоюзий тоабашта, из хьалхадаьккхад. Боламе дакъа лаца ех, юххьанцара профсоюзаш санна, шоаш къаьстта бола профсоюза доакъашхой а; балха шерашка, яьннача ханага хьежжа доацаш.

Белгалду, «Къахьегама цхьоагӏо» – из болама цӏи хинна ӏац, из ба хӏара денна Гӏалгӏайче а ерригача Россе а дӏахьош бола профсоюзий болх.

Дӏайихьача кхетачене техкар лоархӏаме хаттараш, уж кхоачашдара декхараш тӏаийцар:

маьтсела бетта дӏайихьа кхетаченаш дика чакхъяьлар. Профсоюзий хьинар дараш цхьоагӏо йолаш бар, къахьегамхой бокъонаш лораяра даькъ тӏа;

2026 шера, тов бетта 8-ча дийнахьа хургйолча отчетно-хоржама конференцега кийчо яра  болх дӏахьоргба чӏоагӏъяьча планах;

ГӏР ООП Союза Кагирхой кхел гӏоргья «Профсоюзаш, РСО-Алане кагирхой: истори, таханара ха» яхача хьаькъалеча турнире дакъа лаца. Кхетаче дӏахьоргья 2026 шера аьтинга бетта 26-27-ча деношка. Из кхетаче нийслу  Ерригроссийски кагирхой Ди, Россе халкъа цхьоагӏон Шу долаш;

кулгалхоша тӏадиллача декхарах,  керда профсоюзий оагӏонаш хьакхоллаш бола болх сиха дӏахьоргба, къаьстта зӏамига, юкъера бизнес дӏахьоча даькъ тӏа;

болхлошта вахара таронаш лоаттаяра дола хьал доаржадеш, тоабаша бартчӏоагӏош тӏехьара тӏа кхолларгья;

2026 шера аьтинга бетта 23-ча дийнахьа, Магасе кхетаче хургья «Профсоюзий Дисконт» яхача программа викалашца. Цига гуллургба юххьанцарча  профсоюзий кулгалхой;

Россе Ди дездеш, чулоацаргья тайп-тайпара кхетаченаш, цу юкъе  #Са КъахьегамХьонаРосси яха болам а болаш.

Кхетаче чакхйоалаш, ГӏР ООП Союза кулгалхочо Оздой Хаде баркал аьлар болхлошта, администраце викалашта, цар айхха бувзам лелабеш, болх дӏахьош хилар белгал а дир. Мехка профсоюзий болам чӏоагӏбара, вахара бувзам лелабара дола хаттараш тӏаийцар, кагирхошца дӏахьош бола болх тоабара декхараш белгалдир. Из геттара лоархӏаме да, Россе халкъа цхьоагӏон Шу долаш из нийслуш хиларах. Де лаьрхӏар ерригача республикан профсоюза юххьанцарча моттигашта дӏадовзийтаргда кастлуш.