Москверча рузкъан оагӏонцарча кхетаче дакъа лоацаш ва мехкарча Минфина кулгалхо
«Манеж» яхача Москверча Керттерча гойтама зале ший болх дӏаболабир Xӏ рузкъан оагӏонцарча кхетачено. Россе экономически, рузкъан гӏулакхех йола къаман моттиг хилар цох. Цу йоккхача кхетаче дакъа лоацаш ва рузкъан гӏулакхех йолча министерствон кулгалхочун декхараш кхоачашдеш вола, мехкарча Паччахьалкхен кулгалхочун гӏонча Вешкаранаькъан Темарлан.
«МФФ – 2026» керттера тема я «Рузкъан оагӏонцара хӏама чӏоагӏа хилар - мехка гӏулакхаш тоаде аьттув хилар». Лоархӏамеча программан юкъе доакъашхоша доаржаду ахчанцарча политикаца регионашка цу оагӏонца дувзаденнараш, иштта бизнес хьаллацар, технологически болх тоабар. Видеогойтамга гӏолла кхетачен доакъашхошка къамаьл дир РФ Паччахьалкхенна кулгал деча Мишустин Михаила. Доакъашхой, спикераш болаш цига гулбеннаб федеральни, моттигашкара хьакимаш, Россе рузкъан гӏулакхех йолча Министерствон, Россе Банка, Федеральни ганза, Россе ФНС, Лархӏара палата, рузкъан оагӏонцарча институташкара, йоккхача Российски компанешкара болхлой. «Сердалога» из хоам бу мехкарча Паччахьалкхера.
Москверча цу йоккхача кхетаче дакъа лоацаш хиларах дувцаш Вешкаранаькъан Темарлана белгалдир экономически оагӏонцара гӏулакхаш тахан боаггӏача боараме къоастадаь, чӏоагӏдаь хила дезилга. Бахархой цу оагӏонцара хьал ма хулла меттадоаладергдолаш, республикера кхоачамбоацараш юстарадоахаш къахьегар да керттера декхар.
Москве дӏахьоча йоккхача кхетаче дийцар цу гӏулакхех, иштта паччахьалкхен оагӏонцарча декхарех. Хӏара шера цу доазон тӏа гулбу кхетачено бизнесе, паччахьалкхен, тохкама моттигашка къахьегараш, уж деррига хаттараш дашха.
