Йиллача ханал хьалха тоаяь яьлар Къаман библиотека
Гӏалгӏайчен Янданаькъан Жамалда цӏерагӏча Къаман библиотека цӏенхаштта тоаяра дӏаболабаь болх, йиллача ханал хьалха чакхбаьлар. «Оргремстрой» ООО болхлой тоабо ше тӏаийца декхараш дизза кхоачашдир. Цу лоархӏамеча гӏишлонга дӏадахар 54 млн сом да. Из тоаеш я «Дезал» яхача федеральни программа чуйоагӏаш.
«Из боккха болх дӏахьош болча говзанчаша тӏера тхов хийцар, керда пенаш хьалдеттар, чура хьал хийцар. Чура, арахьара инженерни гӏирсаш хийцар, цу юкъе хин, фо кхетийтара, тока ӏалашо йолаш; иштта кораш, наӏараш оттадир, чура балхаш даьхар. Из бахьан долаш, таро хилар книжкаш лорадара йола моттиг шеръе. Берригача балха тӏахьожаш ба республикан капитальни гӏишлшъяра урхаллен инспектораш. Таханарча денга кхоачаш, деррига гӏишлон декхараш кхоачашдаь даьннад, хӏанз уж йистедаларах каьхаташ министерстве дӏачулуш да», - аьлар «Сердало» газетага Гӏалгӏайчен гӏишлошъяра министерствос.
Мехка гӏишлошъяра министра Иленаькъан Мусас белгала ма дарра, Шолжерча Къаман библиотекан гӏишлон технически оагӏорахьара болх дӏабихьар. Цо белгалдир, цига баь болх дикал йолаш хилар. Хӏаьта кердаяьккха гӏишло кхерамзле йолаш, дукха балхаш чулоацаш культуран моттиг я.
