Вай мехкагара Паччахьалкхен Думан депутата тешал дусаш да Татренаькъан Муслимага
Паччахьалкхен Думан вай мехкагара депутат волаш, дӏахо ший декхараш кхоачашдеш хургва Татренаькъан Муслим. 100% хоржамхой протоколашца болх чакхбаьккхачул тӏехьагӏа, гуш хилар хоржамашка цо котало яьккхалга. «Цаӏ йола Росси» яхача партегара волча цун тӏехьа отташ 81,99% бахархоша кхадж тессаб.
«Сердалога» мехкарча Паччахьалкхера кхаьчача хоамах, депутатски тешал дусаш хиларо дӏахо а вай республикан хӏама лакхерча бокъоний оагӏонца доаржаде, хьалхататта аьттув лу Татренаькъан Муслима.
2021-ча шера болабелар цун Паччахьалкхен Думера парламентски болх. Энергетикан оагӏонцарча Комитета доакъашхо хиларга хьежжа, федеральни моттигашцара бувзам дикка чӏоагӏбаьб цо.
Вай республикера вахара-экономически оагӏонца дувзаденнараш тоадара тӏехьа лоархӏаме дакъа лаьцарех ва депутат, иштта кхыдола кхоачамбоацараш юстардоахаш а къахьегаш ва из.
