Магӏалбика кхале хоржамий чаккхе йир, дӏахо бе беза болх бийцар
Магӏалбика кхален администраце кулгалхочо Къоастой Ӏаддал-Хьамида балха кхетаче дӏайихьар доакъой кулгалхошца, цига дийцар чакхдаьннача хоржамех. Цига чаккхе йир хоржамаш дӏахьош хиннача наьха балха. Доал деча даькъ тӏа кхадж тассара болх дика чакхбаьлар, цхьаккха кхоачамбоацар юкъе а доацаш. Массадолча кхадж тассара кийчдаьча доакъошка дика хьалаш вӏашагӏдехкадар, цо таро елар бахархошта законо луш йола кхадж тассара шоай бокъо кхоачашъе.
«Къоастой Ӏаддал-Хьамида баркал аьлар массанена цу юкъе дакъа лоацаш хиннарашта, из бехктокхаме болх дӏабахьарах. Дӏахо дийцар лаьттан тӏахьажара даькъ тӏара дош а. Кхален кулгалхочо тӏадиллар хьалъеш йола гӏишлош законах йоагӏаш йий, иштта лаьттан закон леладой хьажар. Из болх ца соцаш дӏабахьа безаш ба, яхаш, дийцар цо. Иштта дийцар мах беш йола моттигаш законах йий хьажарах, бокъо луш дола каьхаташ доацаш мах бу моттигаш гучаяхарах, уж законо дӏадехача беса хилийтарах», - аьлар «Сердало» газетага Магӏалбика кхален администраце зарбан болх лелабераша.
Къоастой Ӏаддал-Хьамида белгалдир хьалхарча аргӏагӏа кхоачашде деза дешаш, царна лаьрххӏа йола ха йиллар. Ше а цу хьала тӏахьожаш хургва из.
