«Цу лоархӀамеча кхетачене дакъа лоацаш хилар республикан кулгалхо Келаматанаькъан Махьмуд-Ӏаьла, Сбербанк яхача правлене кулгалхо Герман Греф, предприниматель, меценат Гуцаранаькъан Микаил, Мариински а Доккхача театра а кулгалхо Гергиев Валерий.

Безача хьаьшаша мах оттабир центра таронашта, цун коллектив даькъалайийцар, кагирхошта ловца баьккхар, кхоллама, Ӏилмай, къахьегама толамаш доахалда, аьнна», - йоах хоамо.

ДӀадолалу керда вахар дешара даькъ тӀа, цун ларда тӀа ГӀалгӀайчен а иштта кхыча моттигий а бахархой таро хургья керда говзалаш караерзае, цо ший аргӀагӀа хьамсара мохк социально-экономически дегӀабоалабергба.

Ше къамаьл деш, ГӀалгӀайчен кулгалхочо Келаматанаькъан Махьмуд-Ӏаьлас белгалдир, ГӀалгӀайчен кагирхоша инновационни проекташ лелаеш я таханарча денна, «Ишкол 21» - из технически говзал Ӏомаяра, хьалхалатта технологеш пайда хьабоалаш лелаяра, таханарча къахьегама даькъ тӀа накъавоалаш хилара йолча таронех цаӀ я.

«Вайна хов, тахан Сберо юкъейоалаяьй корпоративай клиенташца болх бара 200 совгӀа искусственни хьаькъала оагӀонаш, из болх накъабоал ахчах пайда эцача. Керда технологеш лелаю тайп-тайпарча балха даькъ тӀа.

ГӀалгӀайчен кулгалхошта, бахархошта лоархӀаме да, таьрахьий, экономически оагӀон хьалхале лелаечун оагӀорахьара терко лоаттаеш хилар.

Россе Президента В.В. Путина цу хьакъехьа ше къамаьл деш белгалдир, искусственни интеллект, таьрахьий трансформаци юкъейоаккхаш хилар, мах баь варгвоацаш дола дика гӀулакх хилар. Из хӀара сагага, дезалга, экономикан, социальни даькъага, организацега, Ӏаьдала балхага кхоачаргда».

«Ишкол 21» дукхача наха программировани оалача балха даькъ тӀа дика таронаш хьаелл, цо иштта новкъостал ду таьрахьий дегӀаахара хьакъехьа ховш дар совдаккха», - аьлар вай Мехкадас.

Ший аргӀагӀа, Сбербанка Правлене кулгалхочо, президента Герман Грефа белгалдир, лоаццача хана из гӀишло хьаеллар.

Тха чӀоагӀа безам бар Къилбаседа Кавказе из проект кхоачашъе, укхаза дукха таронаш я. «Ишкол 21» йолча Ӏомалуш бола кагирхой эшаш ба. Царех 100% болчарна хьабе болх хургба. 70% бараша ишкол йистейоаккх, царех 30% дӀахо дӀаболх», - аьлар цо.

«САФМАР» ганза кертте латтача предприниматела, мецената Гуцаранаькъан Микаила аьлар, ГӀалгӀайче Академи хьаеллар керттера бахьан - регион, еррига Къилбаседа Кавказ дегӀаяр, цун кердача вахара наькъаш тоадар да.

ГӀалгӀайче дукха ба, шоашта карагӀдоалар маьхалдаккхара йола таронаш эшаш бола кагирхой. Цудухьа оаха хьакхеллай из оагӀув- информационни технологи, таьрахьий бизнес.

Оаха баркал оал, тахан Россе меттел дерригача дунен тӀа а эшаш йолча инновационни дешара проекта «Ишкол 21» наӀараш хьаеллача мехка, Сбера кулгалхошта», - аьлар Сафарбика Микаила.

ГӀалгӀайчен столице, Магасе цифровой дегӀаахара Академе ларда тӀа «Ишкол 21» хьаеллар цӀай хилар республикан бахархошта. Из дӀадихьар А.Кадырова цӀерагӀча центральни аллее. Хьаьший а бахархой а гӀадбигар моттигера продукци, говзанчаша шоай кулгашца даь тайп-тайпара гӀирсаш, кхыдола пайданедараш дола ярмаркаш, кхоллама акцеш цига дӀахьош хиларо.

Республикан бахархоша мах оттабарга хьежача гуш да, тахан ГӀалгӀайчен бахархошта, хьалхарча аргӀагӀа кагирхошта, хьалхалатта технологи лелаяра бола никъ хьабийлла хилар; Ӏилма, кхоллам дегӀабоалабара, экономика, социальни даькъ тӀа дукха хаттараш кхоачашдара бола аьттув ба из. ТӀеххьара а из деррига наьха вахар дикагӀа хилийтара, хьалаш тоадара юкъедена доккха дакъа да.