Боккхача тӀема аренашка моастагӀа вохавеш лаьттарех дувцаш, хьалкхедаьд вай. Тахан, Даьхен гӀулакха ураовтта безача хана, майрра дӀахьалхабувл цох дог лазараш, цун сий лакха леладераш. ТӀема операцен юкъе латташ бола вай къаман дуккха къонгаш лоархӀамеча сийлен совгӀаташца белгалбаьб.

ХӀаьта, цар шоашта хьалхашка лоаттаду декхар ма хулла дукхагӀа орденаш, майдилгаш яхарца дувзаденна дац, цар декхар - эздийча оагӀорахьа вай къам дӀадовзийташ; Даьхен гӀулакх, сий лорадар да! ДагадоагӀий шоана, Твардовски Александра язъяьча поэма турпал волча Теркин Василе дешаш:

«Са новкъостий, со кура вац.

Сов гаьна хьежаш, са оамал яц,

Сенна еза сона орден? - ях аз,

Майдилг яларах хургьяц сона вас».

Хала никъ текхачул тӀехьагӀа, аьттонга мишта кхача йиш я хьагойт Беслана вахара деноша.

БукътӀехк кагьяьй, хьоа оагабаьб, аьнна, кулгаш Ӏохийца Ӏоховргварех вац из саг. ЦӀавенача дийнахьа денз; дукха, беркате хургдола гӀулакхаш де кхийнад цун. 31 шу даьннача Беслана дика кхетаду, дешар сага вахаре мел эшаш, керттера моттиг дӀалоацаш да. Цудухьа, ший дегӀа хьал цхьа кӀеззига тоадала доладелча, «паччахьалкхен моттигашка доал дар» яхача оагӀон магистратуре эттар из.

Тахан Даьхен гӀулакха арабаьнна лелараш а бицбац цо. Лозабаьча бӀухошта, де доацаш байнарий дезалашта новкъостал лоаттаду цо, ше санна болча тӀема доакъашхошца цхьана. Вахаре цхьацца моттигаш хьалаьца, дӀахо болх дӀабахьа гӀерт тӀема ветеранаш. Тайп-тайпарча дешара моттигашка кагирхошца кхетаченаш еш, царца болх дӀакхахьар дикка пайда беш хул.

«Вахара наькъаш тӀа дайзараш дувцаш гучадоал, мел чам болаш довза гӀерт бераш уж хӀамаш. Шоашта хетар цар дувцаш хилча, бокъонца низ тӀакхет дӀахо а царца къахьега. Цхьаболча боккхагӀа болча дешархоша дувц, Ӏаьдала балха этта, Даьхе лораеш баха ловш хиларах. Цар дог ураоттадеш, нийсагӀдар хьалхадоаккхаш хила деза вай, хӀана аьлча кхоана цар шоай баламашца лораергья вай Даьхе, къаман яхь, сий», - дувц Беслана.

Массахана спортаца бувзам болаш хиннав Дошхьакхалой Ӏумар. «Даьхен Лорбой» яхача ганза филиало дӀайихьача цхьан яхьо дуккхача берий дегашка лаьттар кхоачашдир. ТӀем тӀара шозлагӀа цӀавеча, къахьега лаьрхӀар цо тӀатеӀӀа, хӀаьта из пайда беш хилар.

Массехк бетта болх бича Ӏадсаькх деттарах йола керда спорта клуб хьайийллар вай мехка. Дуккхача наха доккха совгӀат хилар цох. Цхьаболча наха вӀалла уйла а яц, мел халонаш, Ӏазап текхад цу наха тӀема аренашка, вахар хаьдача тӀема новкъостех мел бийлхаб уж…

Дуккхача халонех чакхбаьнна, дукхача дикача новкъостех къаьста, вахарах дог ца эккхаш, дӀахо къахьега, цхьацца пайданедараш кхолла гӀерт уж. Даьхен гӀулакха, хьем ца беш, арабийннача наха дика бовз сатем болча, мерзача вахара чам. Царна санна вайна цӀаккха а бовзаргбац из!