ТӀема аренашка цхьаккха бувзам боацаш байна шоай да, воӀ, воша хьакорабарга сатувсаш болча наха доккха гӀо да цу моттиго дер. Цхьаккха тайпарча дешашца дӀаоалалургйоацаш йоккха хало, бала ба из дега. ХӀанз-хӀанз фу хозаргда-хьогӀ, яхаш, дика е во кхаъ боагӀаргба-кх тхога, яхаш, вахар чӀоагӀа Ӏоткъаме хӀама да дега. Де доацаш байнараш лохача оагӀон доакъашхой геттара чӀоагӀа болх дӀахьош ба тахан. Семинар дӀаяхьара бахьан цар гӀулакх дикка тоадарца дувзаденна дар. Масала, психологически Ӏилман кандидат йолча Мильчарек Натальяс ший къамаьла юкъе дийцар иштта хало енача наха гӀо дар, уж хьаллацар мишта хила деза. Вай республикера цига ваха хилар СВО ветераний Ассоциаце кулгалхочун гӀонча вола Хьаьшанаькъан Хьамзат. Хьамзата белгалдечох, ала деззача аьннача нийсача дешаша дега дарба ду, вахар хаьдарий, де доацаш байнарий гаргарча наьха хьал кӀеззига аттагӀа ду.

«Фу дича бакъахьа да ца ховча хана, сага де йиш йола эггара нийсагӀдар - хиннар дӀатӀаэцар, дича дикагӀа хургдар юкъедоаладар», - дийцар Натальяс. Лакха начӀал дола спикераш юкъе болаш дӀаяхар кхетаче. Сага тӀехкий анатомех дийцар Веселова Дарьяс; Хроменюк Данила хьалхадаьккхар лелхаш йолча хӀамаех лоравалар, царцара болх; Нуруллин Реналя СВО ветераний ассоциаце каьхаташцара болх дӀахьош эша лоархӀаме хоам бир. Молекулярно-генетически лабораторе экскурси дӀахьош, вай мехкахочоа дайзар бӀухоех дисар тохкаш бола болх мишта дӀахьош ба, иштта байнараш лахарах йолча Россе музея гӀулакх дайзар. Суда-лорий говзанч йолаш, 30 совгӀа цу оагӀонцара Ӏилман статья язъяьча Иогансан Елена юкъе йолаш дӀахьош бар из болх. 25 шу совгӀа да молекулярно-генетически оагӀонцара тохкамаш деш цо из болх лелабу. Ерригача Россе хоамий-тохкама моттига хьалхалаттача Коноплев Александра белгалдир, Сийлахь-боккхача Даьймехка тӀема доакъашхой хиннача бӀухошкара СВО операце де доацаш байнача бӀухошка кхоачаш бола болх вӀалла соцам боацаш дӀахьош латтилга. Цо дувцачох, таханарча Ӏилман балхо боккха аьттув лу байнарий цӀераш меттаоттае.

«ДНК- экспертизо байнарий цӀераш меттаоттаярал совгӀа, шерашка цар наха дагалаьттача хаттарашта жоп лу. Укх моттиго тахан дӀахьор лоархӀаме, боккха болх ба. Бакъдар меттаоттадара, дайнар гучадаккхара тӀехьа чоалхане болх ба чакхбоаккхаш латтар», - дийцар тхога. Тайп-тайпарча ханашка бӀарчча мехкаш дегӀадара наькъаш хувцаш хьаденад дунен тӀа. ХӀаране ше-ший наькъаш хиннад- цаӀаш шоай наха толашагӀа дола вахар Ӏалашде гӀерташ хиннаб; вожаш культуран, Ӏилман оагӀонца доккхий дикаш де хьийжаб.

Россе деррига къамаш бувзам, барт болаш хилара тӀехьа лаьттад вай мехка. Машар, беркате вахар деза вайна тахан, иштта кхыдолча къамашта юкъе из хилар а лов. Даьхе езар, из лархӀар сага дегӀаца дахаш хул, цун хӀама лорадеш бола къонгаш мел болча хана, доккхалца къамаьл де йиш йолаш да вай. БӀухошца, царна хьалхашка латтача халонашца, Даьхенцарча безамца дувзаденна лоархӀаме къамаьл дир Россе турпал волча Баксиков Рашида.

«Дог ураоттадарал совгӀа, машара, турпалхой гӀулакхий мах бовзийт иштта йолча кхетачено», - белгалдир Османа Хьамзата. Къамашта юкъера барт, бувзам чӀоагӀбара тӀехьа лоархӀаме хилар Татарстане дӀайихьа ерригача Россе кхетаче, цхьа уйла йола, къахьега лаьрхӀа нах вӀашагӀтехар цо».