Де доацаш байна да, нана лохаш, ше моастагIашта кара вахар из. Цигара мукъаиккха го боахаш лелаш, юха а лаьцар. Цигара мукъаваьлча дукха меттигаш техкаш къахьийгар Тимура, бакъда, да, нана таханарча дийнахьа а де доацараш байначарна юкъе латт.

Нана, Рукъет, ше болх беш хиннача дарбанчера йигай дIа, да Салман ший коара вигар. Ший кхо йиша, кIалхара баьха, Назране даь-воша волча баха битар цо, ше Москве юхавахар дешар дIачакхдаккха. Хьалхашка улла никъ аттачарех бацар.

ХIанз из йижарий ураовттабе, лелабе безаш вола цIен да вар. Дешара мукъаваьлча «Лукойле» болх беш ха яьккхар Тимура. 1997 шера, юриста диплом бе а доаллаш, ГIалгIайченах кхийттар из.

Шолжа-пхьерча прокуратуре, следователь волаш, дIаболабир ший къахьегама никъ. Йоккха юкъ ялалехьа из болх беш Назране хилар из. 2004 шера лоархIаме долча гIулакхий следователь хилар цох республикански прокуратуре.

Хала дар Тимура дийнахьеи бисаннеи даьх, наьнах фу хиннад-хьогI, мичахьа ба хьогI, яхача уйлашца ваха. Цхьан дено унзарча оагIорахьа хийцача вахаро, дог делхадора. Бакъда, де хIама дацар! ДIахо ваха везаш дар гIулакх, къахьега дезаш.

Кхаь йиший вахара уйла е езар, ший вахар а дар цхьан кога тIа даккха дезаш. ЦаI мара воаца, цIен воккхагIвола воI хиларга хьежжа, къонахчал, денал, яхь яха оагIонаш цун хьалххе дайзадар.

Цецбувлар цун новкъостий, из вовзараш, иштта къона воллашехь мишта аьттув боал ше наха юкъе лакхача лагIа тIа лоаттаве, лархIийта. Цу наха юкъерча лоархIамо гIо дир цун саг йоалаеш а. Назранерча прокуратуре яйра цун тIехьагIа, ший цIен-нана хургйола саг. Юридически институте деша ягIаш, практика дIахьош яр прокуратуре. Сихвенна цун дай болча саг вахийтар Тимура, бакъда, саг хьалургьяц аьнна юхабаьхкар. Къона зIамига саг, иштта атта юхаваргварех вацар, дIахайтар, ше дог дилла Iоховргвоацилга. Из кхетадаьча даьша, массе меттиге из тахкача, наха даьча хозача тешалах кхы уйла ца еш йоI хьаелар. 1999 шера цун коа яьлар Залина.

— ХIана вацар хьа да цунга хьо дIаяла раьза? Сено юхатеттар из? — хет аз Залинайга.

— Из цаI мара воаца воI хиларо юхаувзавора из. Са а вац воша, кхо йиша мара. Цул совгIа, со эггара бочагIа яр цун.

ХьоалчагI дIадаьлча, Назранера, Майске ваха дIавахар Тимур ший ши йишеи нускали ийца. ЙоккхагIа йола йиша цу хана маьре яха яр. Шоай цIа дацар цар, бакъда, халонашка шоаш эгIаз а ца кхувлийташ, беркате, Iимерза дIадоладир керда вахар.

КIаьда оамал йолаш, Iимерза йола Залина хьачуяьннача дийнахьа денза цун оагIув хинна, дега доттагIа йолаш дIачакхъяьлар. БIарччача дийнахьа шаккхе балха баьхка чубаьхкача, хIара сайран хIана бац аьнна хьаьший хулар царцига. Тимура балха — новкъостий бар дукхагIа ихараш. Тимура тIеххьара сайре а иштта хилар.

Дега хала долаш дувц Залинас: «Цу сайран Тимура ши новкъост вар тхацига. Iуйран Железноводске цхьан гIулакха баха хинна, отара кIала шоай къамаьл деш, пхьер дуаш багIар уж. ЦIаьхха, герз детташ хаза, ладувгIа эттар тхо дерригаш. Ученеш хила еза уж», — аьлар Тимура.

Коа йоаллача крана кIала, ший кулгаш дила, ше Iодаьккха сахьат хьатIацадоллаш: «Со уж чубига, 15-20 минота чувоагIа хьона аьлар. ЦIаккха а цу сахьатацара къасташ оамал яцар цун. Цецъяьнна, » Сахьат дIадоллаций Iа?", — аьлар аз. " Доллац«- аьнна, дIаараваьлар Тимур.

Машен дIачуерзалца царна тIехьахьежаш лаьтта дIа коа яьлар со. НиI тIакъовла кхелехьа, юха наIарга енача машена тата хезар сона, шийна улув вагIачун тIагIолла хьакхайкар из: «Со дукха ца говш чувоагIаргва хьона». Машен масса къайлаиккхар. Из ала юхавенавар из аьнна, хийтар сона.

Цхьа сааькх ухар са, гош мелъденнача санна хеташ, Iолохъелар со гIанда тIа. Уйлаш хьувзар керта чу сатем боабаь, вIалла Iоцадоаккхаш хинна сахьат а цIагIа дитар, цхьа тамашийна а ва из тахан. Шийна тара воацаш ва. Иштта сахьувзаш со ягIаш Назранерча маьр йишас телефон теха, Тимур цIагIа вий аьнна хаьттар.

Ара ма вала ала цунга, доккха хIама да укхаза доаллар яхаш, цо къамаьл хьадешшехьа бувзам дIабаьлар. Ма даггара дIайиттача бувзам кхы бацар. Цхьан юккъа хьаэтта, дIа-хьа йист хила кхийра тха Тимураца. — Майскера аравоалаш ва со, ГОВД Iочудолх тхо, цхьа хатар хиннад йоах цига аьлар. Цигга бувзам юха а хаьдар. Са кхийнзар цунга кхы хIама дIаала, лоралелахь аьнна йист хила а. Ма унзара бийса яр из, дувцалга а доацаш!

Дог детталуш уйлаех еха ягIа йисар со. Са тоссаш коа венача Тимура новкъосто из лозаваь дарбанче ва аьлар, ше Назране даь-веший коа Iочуя еза аьнна. Тимур больнице вале, цига дIадаха мегаций вай аьлча, цкъа цига Iочудаха деза йоахар.

Цу къамаьла юкъе да со тейора сагот ма делахь, сагот ма делахь яхаш. Цхьаккха хIама дагадоацаш Тимура даь-воша волча Iоера Залина. ЦIен юкье хьоарчабаь уллача кIувса юхе гIолла, вочун уйла йоцаш тIехьйоалаш яр из, цIаьхха цу юкъера хьакъедача, шийна йовзача ботинкаша соцаяьецаре.

Деррига дуне хаьрцар Залинайна цу дийнахьа! ВIашагIийнадар деррига! Юхь мара бIаргаяйтанзар цун Тимура. ДегI чIоагIа човхадаьд аьлар. ЦIий ца соцаш, шозза хувцадезаш хилар мерчи. Ах шу доаллаш, Залинас, воI вир Тимура. Из тахан Назранерча лицее 11 классе дешаш ва.

Оамал, йистхилар, деррига а ший даь да Мухьмада. Ший дас хержай цун из цIи, малха валалехьа. 17 шу из хатар хинна дале а, цхьан дийнахьа байлац Залинай бала.

Дог массе хана а балано Iувжаш латт... Хеталу, хIанз ниI хьа а йийла Тимур хьачуваргволаш санна. РФ Президента амарах «Орден Мужества» хьожайир цун.

Хоза ваьхача шин сага, иразах дизза хинна, лоаца денош. Сатийсадар цар доккхача дикашка, хургдолча иразеча деношка. Лоаца хилар гIадаахар! Цудухьа, селхан хилча мо мара хетац из деррига Залинайна.

Ерзац дега чов! ЦIаккха а ерзаргйоацарех я из! Цу хана, 2004 шера, из хатар хиннача дийнахьа сеца латташ санна хет вахар. Дале а, цу хана денза болх беш, шеи воIи кхоабаш хьайоагIа Залина.

Тахан Верховни суде я из болх беш. Цу хана, 17 шу хьалха квартира елар царна Назране.

Тимур дийна волаш хиннача бесса, дукхагIа бола хьаьший прокуратуран болхой ба. Шоашта мога гIо деш, эшачунга хьожаш теркал ю цар Залина. Цхьаь биса ха яц цар воIаца, бакъда, Тимурах диса дуне даьссеи халеи хетт.

Доккха баркал оал цо, ший дикача цIен даь, цIи йиц цаеча новкъосташта.