Хьаьна лаьтта
Шоай кхаш тӀайоагӀача бӀаьсти дӀаде кийчдеш ба бахархой
Гуйре - из гаьнаш, кӀотаргаш, комараш, комсаш дӀайогӀа ха я. Ший доалахьа лаьтта дола хӀара вахархо цу гӀулакха къахьегаш хила веза. Беш гурахьа юха ахка, гаьнаш дӀатеда, котамий бу, хьайбаш, жа чудола кхий цӀенде, чура дӀайха хургдола болх бе, беша хий детташ бола пед боассабе, йоархӀаш дӀаяха, иштта кхыдола балхаш де кийча хилар лоархӀаме да.
Шахьара куран тӀа вахача сага таро я; ше вахача моттига юхе зизаш, тайп-тайпара гаьнаш дӀайогӀа. Лоацца аьлча, сага къахьега деза шийна болча пайданна беша е бежкарта, иштта ший боахаме леладе деза тайп-тайпара хьайбаш, из ба дика пайда луш бола къахьегам.
СалоӀача деношка базар тӀа нийсделча, вай кхетаду, хьайбашкара хьадоаккха маша дукхагӀа а тайп-тайпара а хулаш латтилга. Ший доалахьа лаьтта долча сага, тӀехьарча хана, дукхагӀа лелабу юртбоахам. Уж хьож дикагӀа дола ялата фу е кердача тайпара хьайбаш эца.
Кхетаде хала дац, республиканна дикагӀа да, кхачан даараш арахецараш дукхагӀа хилча. Дулх, шура, хьоар, Ӏов, баьцадаараш, сомаш, чкъаьра, комараш, кхы дӀаходар арахецар - из республикан керттера рузкъа да.
ХьалхагӀа вай мехка хьахулаш ца хинна сомий гаьнаш дика дӀалат тахан, сомаш а лу ГӏалгӀай мохк бӀайха хиларах. Цунна тешал ду Москве дӀахьош болча «Дошо гуйре-2024» яхача гойтамо. Цигарча тайп-тайпарча юртбоахамца дувзаденнача даараша хьагойт, тахан мел чӀоагӀа дегӀайоагӀаш я Россе агропромышленни комплекс. Укхаза го йиш я 100 совгӀа хьайбаш, оалхазараш: доахан, жа, гаьзарий, гӀажаш, котамаш, кхыйола садоалла хӀамаш. Цудухьа интернетага гӀолла шоаш фу леладергдар-хьогӀ, яхаш, шоай ха йоаеш багӀарий таро я ялх сотех долча лаьттан тӀа леладе йиш яр шоашта харжа.
Геттара доккха декхар шийна хьалхашка а оттадаь, де дезаш хӀама дац из, дӀаволавала йиш я зӀамагӀдолча гӀулакхагара. Тайп-тайпара даар арахецара эша дика балха говзал а Ӏомаергья иштта.
ХьатӀаенача гуйрено а иштта тӀайоагӀача Ӏан шелало а уйла яйт, уж декхараш мишта кхоачашдергда-хьогӀ, яхаш. Тахан е еза цу деша уйла, 2025 шера ше дӀае лаьрхӀачун, ше леладергдолча коа тӀарча хьайбай, кхыметтел ийцача шин гӀажо а пайда бахьаргба! Пайдане къахьегам ба, цӀагӀара дезал беша арабаьха, болх беш хилар. ДукхагӀча даькъе нийслу, даьй ара, беша болх беш боахкаш, бакъда берашта шоай беша малагӀа гаьнаш ягӀа ца ховш. Вай мехка дика, хьаьна лаьтта да, геттара йокъал этта ха а хилац - из кхетаде а цун хам бе а беза. Бӏаьш нах ба паччахьалкхен экономикан, кхыча доакъош тӀа тахан къахьегаш. Уж ба Ӏаьдала балхаш тӀа бараш: лораш, хьехархой, гӀишлонхой, кондитераш - кхы а дуккхача профессеш йола нах. Цул совгӀа, цар шоай цӀагӀа, лаьтта пайда баргбола къахьегам дӀахьу.
Вай из дика Ӏадат дита йиш яц, массайолча хана къахьегам совбоаккхаш даха деза вай. Кийча хила шоай бел бе а елла, беш ахка.
