Мехка цӀенал
ГӀалгӀайчен ЖКХ - доал деча моттигера лоархӀаме дакъа
Дукха нах бах укх дунен тӀа доккхача дикашка сатувсаш, кхыча дунен тӀа фуд хьажа ловш, вӀаьхий хилара тӀакхувш, дунен тӀа йоккха ха алсама хиларга сатувсаш, дерригача дуненна цӀихеза хила гӀерташ. Из иштта хила дезаш а да, цӀена хий молаш, хоза лостам баьча цӀагӀа вахаш, дикача фильмага хьожаш, дӀайхача цӀагӀа наб еш саг хила гӀертар санна да из. Нагахьа санна цу тайпара хьалаш деце, сага хала хургда ше лаьрхӀачунга кхача.
Таханарча деннара ЖКХ болхлоша беш бар чоалхане болх ба, хӀара денна ГӀалгӀайчен шахьарашка, юрташка бахача наьха хьал тоадара тӀахьехаш ба из.
Цу юкъедоагӀаш да тайп-тайпарча гӀишлошта капитальни ремонт яр, наха элетричествоца Ӏалашо яр, хий хилийтар, йӀовхал лоаттаяр. Иштта цу чу доагӀаш да доазонаш тоадар, совъяьнна нувхаш дӀаяхьар, гонахьара моттиг цӀенъяр, инженерни хьалаш леладар, иштта кхыдола балхаш.
ХӀара денна хӀана дац аьнна, Магасе, Наьсаре, Илдарха-ГӀалий тӀа, итташ кхыйолча вайцигарча нах бахача юрташка ЖКХ чубоагӀаш болча къахьегамхоша дукха сиха де дезаш дола балхаш дӀахьу. Уж да лийлха, тишъенна хин турбаш хувцар, бӀеха хиш цӀендеш йола моттигаш мукъаяхар, трансформатораш тоаяр, цӀи йоаяра эшаш йола кийчо лоаттаяр, кӀоагаш тӀа яда хьамча кепаш хувцар, хий чусоцаш йола моттиг тоаяр.
Теркалъел «ГӀалгӀай Республикан хица Ӏалашо яра, хий дӀа-юха хьожадара ГУПа «ЦаӀ йолча оператора» гойтама материалаш, хӀара сага ховш да мел чоалхане декхараш кхоачашду цун говзанчаша а болхлоша а дийнахьа, бийсан. Хий ийккха моттиг нийсъелча, из моттиг ахка езаш хул, цига бӀеха а тӀаьда а я, къаьнарча турбашкара хьалъяккха езаш хул дукха кхертӀой юкъе дола бӀехал, тӀоадал.
Ӏан юкъе а, догӀа е лоа делхача хана, болхлой тоаба къахьегаш хул, ма хулла сихагӀа наха хий хургдолаш из болх дӀабахьа гӀерташ.
БӀеха хиш чакхдоала моттигаш цӀенъе эттача, цига фу доал вайна дика хов; укхаза, хьай кара хӀама а доацаш, дагадох «ЖӀале дог» яха фильм, цига профессора Преображенске оал: «Кегар цу моттиге бац, шун кертошка ба».
Тахан цхьаболча наха цецвоаккх, бӀехача хи чу йоккхий хӀамаш чукхувсаш, турбаш из бахьан долаш дӀакъовлалуш нийслу. Из йоаккха доакъазал я, дукха нах чубахача квартирашка хӀаранена тӀехьа хьежа варгвац. Нах шоаш кхетаргхиларах теша лов. ХӀаьта ЖКХ болхлой хӀама тоадеш, бахача наьха вахар аттача доаккхаш ба, цар сакхетам сомабаларга сатувсаш а ба.
БӀаьш, эзараш болча наьха балха ди дӀадолалу ков, урам, гонахьара доазув гуш хиларца. Нагахьа санна нувхаш йоацаш, гонахьа лостам болаш хуле, вай дагахьа а сийрда уйлаш юс. Нагахьа санна михо асфальта тӀагӀолла тӀормигаш керчадеш, каьхаташ удадеш хуле, дега Ӏоткъам хул.
ХӀара денна вай дегаш хьестараш ба ЖКХ болхлой, цар новраш хьокх урамашка, нувхаш дӀахьу, цӀенъю нувхаш чукхувса яьшкаш, кхыйола моттигаш.
Кхайкабеш боаца, хӀара деннара из болх ца хилча баргбоацаш ба. Из боацаш тахан йиш яц.
