Илдарха-ГӀалий тӀарча дарбанчен керттера лор унахцӀенон гӀулакхех йолча Министерствон кулгалде оттайир
Вай Мехкадас Келаматанаькъан Махьмуд-Ӏаьлас амар денна, унахцӀенон гӀулакхех йолча Министерствон кулгалде оттайир Илдарха-ГӀалий тӀарча дарбанчен керттера лор йолаш болх баь Ӏалбаканаькъан Зара. Из хоам «Сердалога» бир Мехкадаь зарбан болх лелабераша. Ӏалбаканаькъан Зара лорий Ӏилмай кандидат, республике цӀихеза лор, ГӀалгӀай паччахьалкхен университета психологех йолча кафедра доцент я.
Москверча цӀаьхха хиннача хатарех йолча институте чакхъяьккхар цо аспирантура 2005-ча шера. Илдарха-ГӀалий тӀарча дарбанче керттера лор йолаш цо болх баьб, 2016-ча шера денз.
Ерригача Россе дӀайихьача «Россе толашагӀа вола керттера лор» яхача яхьашка котало яьккхар цо. Дукхача Ӏилман балхашка дакъа лаьца я Ӏалбаканаькъан Зара.
Масала, цо тохкамаш даь Ӏилман балхаш дувзаденна да нейропсихологеца, психогенетикаца, психофизиологеца, клинически психологеца.
