Вай мехкарча «Къонача эскара», Россе Турпала Боканаькъан Мустафай цӏи елар
Российски эскара керттерча академически театре, Даьхен Турпалий Ден хетаяь, Ерригача Россе къонача эскархой «Баркал ала Турпалашта» яха кхетаче дӏайихьар. Лоархӏаме байракхаш елар ялх моттигерча «Къонача эскарашта». Цу юкъе бар Россе Турпала Боканаькъан Мустафай цӏи лелаеш бола оагӏув а.
Совгӏаташ дӏалуш хиннар вар инарал-майор, РФ Герзашцарча низий тӏема-политически оагӏон кулгалхочун хьалхара гӏонча вола Гусев Сергей. Тӏой-Юртарча № 4 йолча ишкола дешархочунга Бештой Джабраилага дӏаелар цо байракх. Вай мехкадас Келаматанаькъан Махьмуд-ӏаьлас ший бувззама оагӏонашка гӏолла белгалдир, моттигерча «Къонача эскархой» байракха тӏа Боканаькъан Мустафай цӏи массахана яхаргйолга.
«Тахан ураотташ болча кагирхошта доккха масал да из. Мехкахочун турпала никъ байзача, Даьхе лораяр, цу гӏулакха латтар малагӏча маьхе да, денал, яхь яхараш духхьал дешаш доацаш, хӏара сага хоржаш бола никъ болга кхетаду цар», - аьлар мехка Кулгалхочо. Боканаькъан Мустафай цӏи тӏехьенгара тӏехьенга кхоачаш, яха езилга белгалдир Мехкадас.
