Кадастра мах оттабара чудоагӏаш хургда Гӏалгӏайчен 120 эзар совгӏа лаьтта
Гӏалгӏай мехка дӏаболабу 2026 шера дӏабахьа лаьрхӏа болча, лаьтташта кадастра мах оттабара кийчон болх. «Роскадастр» ППК филиала хьагойтад 120 эзар лаьттан дакъа. Хӏанз укх сахьате, говзанчаш хьожаш ба цу хоамаша хьагойташ долча хьалага, юкъе кхоачамбоацараш нийслургдоацаш.
Гӏалгӏайчен кулгалхочо Келаматанаькъан Махьмуд-ӏаьлас мехка доалахьарча лаьттай хьалах волча министра тӏадиллар массайолча оагӏорахьа цу балхага хьажар, из цхьаннахьа юха ца соцаш дӏабахьар.
Цул совгӏа, говзанчаша гулду хоамаш: мах оттабу ЕГРН регистраци яьча гӏулакхашта, иштта кхыча моттигашта. Кадастра мах оттабара хьахержа 190 цхьан тайпара моттиг я. Доалахьарча боахамий, лаьттан хьала министра хьалхашка декхар оттадаьд, ер шу чакхдоалаш кийчон балхаш йистедаха, аьнна.
«Кадастра мах оттабара болх лоархӏаме гӏулакх да. Из болх ше ма барра ӏаткъаш ба доал дара доакъош дегӏаахара, иштта лаьттан ганз лелаяра. Декхарийлачар из болх лерттӏа, бехктокхаме дӏабахьарга сатувс», - аьлар вай Мехкадас.
